Cinco puntos por unos medios públicos al serviciu d’Asturies

rtpa

La Xunta Xeneral ta tramitando la segunda llei de reforma del sector públicu, que va regular, sobre manera, la Radio Televisión del Principáu d’Asturies (RTPA), axustándola a la llei audiovisual nueva y a los criterios d’austeridá. Ye de reseñar que la llei actual señala ente los sos oxetivos la promoción de la cultura y la educación, «con especial protección del bable, mediante la promoción del so usu y espardimientu nos medios de comunicación social». Sicasí, esa especial protección nun llegó a más d’un 5% de la emisión na TPA y un 2% en RPA, mentes que na web rtpa.es l’asturianu cuasi nun existe. Por eso, pareznos que resulta evidente que la llei tien que valir pa recoyer esplícitamente la necesidá de que la televisión y la radio autonómica xueguen un papel fundamental nel procesu de normalización social del idioma.

Actualmente, hai díes de la selmana nos que nun hai programación n’asturianu y nos demás espacios nun hai una continuidá qu’ayude a reforciar l’efectu normalizador, dalgo que choca col éxitu de los programes d’entretenimientu nesta llingua. Ye tamién especialmente grave l’ausencia de programación infantil n’asturianu, dalgo que supondría una importante fonte de trabayu gracies al establecimientu d’una industria del doblaxe n’Asturies. Asina, como exemplu, l’aparición de TVG en Galicia xeneró una industria que mantién a 300 persones y a seis empreses de doblaxe, pero TPA ye la única televisión europea d’una comunidá billingüe que nun emite programación pa los más neños na llingua propia. Per otru llau, tamién ye grave’l vetu a esta llingua nos espacios informativos y deportivos. Amás, rescampla l’ausencia del sector lliterariu, musical y teatral na parte mayor de la programación, cuando son entidaes básiques pa l’articulación d’una industria cultural. Y ye que la televisión que paguen tolos asturianos nun respeta lleis básiques como la Carta Europea de les Llingües Minoritaries, l’Estatutu d’Autonomía o la Llei d’Usu.

L’aparición de la TDT y l’aumentu na ufierta de canales esixe a la cadena una precisión mayor na so programación, que tien que basar na especificidá y nes espectatives de l’audiencia a la que se dirixen. TPA namás va tener sentíu y namás va contar col respaldu de la xente si va del llau de la nuestra realidá llingüística y del sector audiovisual asturianu. Los datos d’audiencia dexen ver que l’usu del idioma propiu ye’l puntu d’enganche ente los ciudadanos y la so televisión. Ye fundamental que los asturianos vean los medios públicos como un serviciu que forma parte de la so identidá, dalgo fundamental p’asegurar el futuru de la cadena y la so aceptación social. Nun queremos qu’a RTPA-y pueda pasar lo qu’a Canal 9.

Por eso, les asociaciones, entidaes y instituciones abaxo firmantes coincidimos nos puntos irrenunciables que vienen darréu y que tienen de recoyese na llei nueva de RTPA, dalgo que pidimos al Gobiernu d’Asturies y a los partíos con representación parllamentaria:

 

1. RTPA tien qu’ufrir un serviciu públicu pa la sociedá asturiana al traviés d’una programación de calidá nes llingües propies d’Asturies, plural y respetuosa coles audiencies, con conteníos empobinaos al interés públicu y de producción propia, asumiendo un rol compensatoriu d’otres cadenes públiques o privaes.

2. RTPA tien que cumplir l’oxetivu fundamental d’impulsu y normalización del asturianu y del gallego-asturianu.

3. RTPA tien que ser exemplar nel so compromisu colos elementos fundamentales y actuales de la cultura asturiana.

4. RTPA tien que ser un referente nel panorama audiovisual asturianu, convirtiéndose nel principal impulsor del mesmu.

5. En resume, RTPA, como serviciu públicu que ye, ha contribuir al procesu de normalización social del asturianu y gallego-asturianu, garantizando l’accesu de la ciudadanía a conteníos na llingua propia en tolos xéneros y promoviendo una industria audiovisual que garantice la producción d’estos conteníos.



Academia de la Llingua Asturiana
Asociación Cultural Rapalacóis
Asociación de Trabayadores pola Normalización Llingüística
Ástura
Atenéu N’Alfoz
Banda Gaites Ribeseya
Colectivo Trafego
Conceyu Universitariu pol Asturianu
Conseyu de la Mocedá del Principáu d’Asturies
Conseyu de la Mocedá de Xixón
Corriente Sindical d’Izquierdes (CSI)
Ensame Xuvenil Trisquel
Foroescena
Fundación Belenos
Fundación Caveda y Nava
Grupu de Baille Tradicional San Félix de Candás
Iniciativa pol Asturianu
Producciones Nun Tris
Reciella (Families pol Asturianu)
Sociedá Cultural Xixonesa
Softastur
Sindicatu Unitariu Autónomu de los Trabayadores de la Enseñanza d’Asturies (SUATEA)
Unión d'Actores d'Asturies
Xeira
Xunta Estudiantil Asturiana
Xunta Moza
Xunta pola Defensa de la Llingua Asturiana

 

Esti manifiestu pue lleese nel blog Cinco puntos por unos medios públicos al serviciu d’Asturies (5puntosxrtpa.blogspot.com) y toles entidaes, asociaciones y organizaciones que quieran sumase al mesmu puen facelo al traviés del corréu 5puntosxrtpa@gmail.com