GRACIES

A otru día de “La banda sonora de la oficialidá”, coles emociones vivíes ayeri tovía na alcordanza, la xente que militamos na Xunta pola Defensa de la Llingua Asturiana queremos agradecer la participación de toles persones qu’ayudaron a facer posible esti llibru-discu y esti espectáculu. Gracies de verdá a escritores, diseñadores, realizadores, músicos y músiques, técnicos y actores que fixeron posible esti proyectu.

Foron cuatro meses de llabor a los que punximos el ramu ayeri con una xornada prestosísima que vamos tardar n’escaecer. Paeznos que cualquiera que tuviera nel teatru va tar d’alcuerdu neso. Nun queremos destacar nengún momentu n’especial porque les emociones tuvieron siempre a flor de piel nes dos hores que duró l’espectáculu.

La música asturiana volvió tar ehí, como nos últimos 30 años, cola so calidá y el so compromisu, apoyando una reivindicación histórica que yá lleva demasiaos años ensin resolvese. Ayeri dixímoslo con música, pero, cola vuestra ayuda, vamos siguir diciéndolo de toles maneres posibles hasta que s’apruebe un marcu llegal que dexe acolumbrar un futuru de normalidá pa les nuestres llingües: ¡Yá, yá, yá, oficialidá!