La continuidá de Virgili dexa en papel moyao'l plan de dignificación del asturianu

pitartpa
La organización recuerda que ye menester que'l contratu-programa y el mandatu-marcu desenvuelvan reglamentariamente la Llei d'Usu
 
Pa la Xunta pola Defensa de la Llingua Asturiana (XDLA), el fechu de que PSOE-PP-IX decidieren apostar pola contunidá d'Antonio Virgili al frente de la RTPA dexa en papel moyao'l plan de dignificación del asturianu, aprobáu apocayá na Xunta Xeneral, amás del alcuerdu d'investidura ente PSOE y IX. Los dos testos falen de potenciar l'usu del nuestru idioma na programación de la radiotelevisión pública. Sicasí, esto choca cola renovación d'un director que nun quixo normalizar l'usu del idioma na programación y que namás lu arrequexó pa los usos humorísticos y diglósicos, ensin nengún procuru pa cola so corrección y calidá. Mesmamente, nun se fixo apueste pola programación infantil n'asturianu, dalgo estratéxico si se quier dar un futuru al nuestru idioma al traviés de la so tresmisión interxeneracional. Ye de reseñar que Virgili ta a puntu de firmar un alcuerdu cola multinacional americana Warner, nel que se van invertir dos millones d'euros que van salir del bolsu de tolos asturianos, pero que nun van xenerar nengún beneficiu nel territoriu.
 
La XDLA insiste en que de poco valen les intenciones de dar pasos alantre cola planificación y normalización del idioma si se dexa de llau la RTPA, preséu fundamental pa dar un reblagu nestes polítiques. Con too, la organización recuerda que tovía queden dellos cargos por nomar na dirección de la empresa pública, como'l de director de programación, que puen ser vitales pa que se faiga una política activa pol asturianu, polo que ye imprescindible cuntar con xente comprometío cola cultura asturiana nestos cargos. Quier dicise, xente que nun se niegue a desenvolver la llexislación vixente -Estatutu, Llei d'Usu y Llei de RTPA, testos que reconocen el papel de la radiotelevisión pública nel procesu de recuperación del patrimoniu llingüísticu del país-.
 
Otra manera, ye fundamental que los partíos políticos y el Gobiernu asturianu empiecen a trabayar nel contratu-programa y nel mandatu-marcu, testos que van desenvolver la Llei de RTPA y onde se tienen que recoyer los porcentaxes llingüísticos y el modelu de programación nes emisores públiques. Nestos documentos ye fundamental que l'asturianu y el gallego-asturianu aparezan d'una manera digna. Tovía más cuando dende la Conseyería de Cultura s'anuncia'l desarrollu reglamentariu de la Llei d'Usu, onde se diz que l'idioma tien que tener una presencia “amañosa” na programación. Una presencia amañosa pa Virgili y el so equipu parez qu'hasta agora foi'l 5%, polo que ye hora de dar pasos alantre y facer un apueste por cumplir y desenvolver la llexislación, ofreciendo na emisión conteníos nuevos que reflexen una imaxe moderna de la cultura asturiana, non namás tradicional.