La marca Puru Remangu recibe’l XXXVI Premiu Andrés Solar de la Xunta pola Defensa de la Llingua Asturiana

Puru Remangu, la inciativa empresarial que comercializa ropa y otros productos con mensaxes n’asturianu resultó ganadora de la edición XXXVI del Premiu Andrés Solar. La Xunta pola Defensa de la Llingua Asturiana (XDLA) valoró de manera mui positiva l’usu de la nuestra llingua na imaxe, nes campañes y nos diseños reivindicativos, feministes y modernos que faen de Puru Remangu una marca reconocible y reconocida, yá tamién fuera d’Asturies. El so apueste pol asturianu tamién pudo vese nes sos redes sociales y conectó cola xente más mozo con iniciatives cuasi virales.
 
Esti añu 2020, foron delles les candidatures propuestes como merecedores del  Premiu Andrés Solar, lo que ye un signu mui positivu de la vitalidá de la reivindicación llingüística n’Asturies y de la voluntá de tantos asturianos y asturianes de vivir y trabayar n’asturianu, entamando proyectos n’ambitos tan estremaos como’l deporte, la moda, la telefonía móvil o los xuegos infantiles, ente munchos otros. La XDLA nun pue más que felicitase y felicitar a toos y toes, amás d’esperar que pa otres ocasiones la escoyeta tea igual de díficil qu’anguaño.
 
Nesta edición, como yá pasara na anterior, la XDLA decidió nun dar la Madreña de Purpurina, el premiu negativu y dexar el Pegollu como únicu gallardón —positivu— d’estos Premios Andrés Solar. Les posiciones en contra de la reconocencia de derechos pa los falantes de les llingües d’Asturies son yá testimoniales y nun merecen un minutu más de protagonismu.
 
Otra novedá d'esta edición ye que, pola situación sanitaria, nun va poder celebrase l'actu d'entrega habitual en Xixón, asina qu'esti xueves 17 d'avientu, a les 20 hores, va presentase un videu especial na canal de YouTube de la XDLA (https://cutt.ly/7hDRbDo) y nes nuestres redes sociales.
 
Queden pocos díes pa dexar atrás esti añu 2020, tan complicáu en tantos aspectos. La XDLA espera cuntar col apoyu de la ciudadanía pa llograr que sia l’últimu ensin oficialidá. Esti 2021 tien que ser el de la movilización que valte los últimos estorbos pal reconocimientu de la oficialidá.