La oficialidá, los espacios y los tiempos

Acaben de cumplise 40 años de vixencia del Estatutu d’Autonomía p’Asturies, que nació ensin reconocer la oficialidá de les nuestres llingües propies: l’asturianu y el gallego-asturianu. Pue discutise si’l restu del articuláu avieyó dignamente o venció ensembre, pero l’artículu 4, el qu’habría reconocer los derechos llingüísticos de la ciudadanía, lleva años arregallando peles costures a pesar del intentu d’arremendalu cola reforma cosmética de 1999 y l’aprobación de la Llei d’Usu y Promoción del Asturianu, claramente insuficientes.

Nestos 40 años, la reivindicación llingüística foi ganando terrén social y institucional hasta’l puntu de ser de les poques demandes que n’Asturies enllenen cais cada añu. La Xunta pola Defensa de la Llingua Asturiana empobinó a la sociedá civil con esta reivindicación hasta les puertes de la Xunta Xeneral, la última vegada encabezando una manifestación de más de 30.000 persones el pasáu 16 d’ochobre. L’abandonu del PSOE asturianu, nel so congresu del 2017, de la so postura contraria a los derechos llingüísticos, y la so victoria electoral nel 2019 alluguen la situación d’esti procesu dientro de la cámara, onde se sienten les 45 persones que representen la voluntá del pueblu asturianu.

La Xunta pola Defensa de la Llingua Asturiana, como parte del movimientu ciudadanu de reivindicación, nun somos un axente na negociación de la reforma estatutaria, pero na midida que representemos a la ciudadania nesti procesu nun vamos dexar de pidir qu’esos derechos tean reconocíos al máximu nivel, quier dicise, el que manda la constitución española y el mesmu que disfruten n’otres comunidaes autónomes con llingües propies distintes del castellanu.

Defendemos una oficialidá radicalmente igualitaria nes instituciones autonómiques de les llingües d’Asturies, l’asturianu y el gallego-asturianu, que desanicie la discriminación de les persones por mor de la llingua qu’usen y que sofite la enseñanza en tolos niveles educativos reglaos y na formación de xente adulto, como garantía del derechu de tola ciudadanía a conocer y usar la llingua que decida escoyer pa comunicase. Queremos que se recueya esplícitamente’l mandatu de la redacción, aprobación y implementación d’una llei orientada a la recuperación y normalización llingüístiques, con garantíes de viabilidá nel plazu más curtiu posible y ensin más condiciones que les que s’apliquen a tola llexislación autonómica. La redacción del artículu 4 tien que ser lo más concisa, clara y llibre d’interpretaciones que se pueda apautar. Con esi espíritu de claridá y cenciellez ellaboremos la nuestra propuesta, compartida cuantayá con tolos partíos que tán dispuestos a negociar:

Artículu 4

1. L’asturianu y el gallego-asturianu, como llingües propies d’Asturies, tienen, col castellanu, el calter de llingües oficiales.

2. Los poderes públicos d’Asturies, atendiendo a la realidá sociollingüística del asturianu y del gallego-asturianu, han garantizar el derechu a conoceles y usales.

3. Una llei de la Xunta Xeneral ha establecer los términos y ámbitos del usu oficial de les llingües propies d’Asturies y ha fixar les zones d’usu predominante d’entrambes.

4. Nenguna persona va poder ser discriminada n’Asturies pola llingua que llibremente escueya pa comunicase.

Nunos díes va entamar el primer periodu de sesiones del 2022 de la Xunta Xeneral. Dende les elecciones del 2019, correspuénde-y al Conseyu de Gobiernu presentar el proyectu de llei de reforma del estatutu y ye responsabilidá del PSOE alcontrar nos otros partíos los apoyos necesarios pa que resulte aprobáu pola mayoría cualificada de los trés quintos de la cámara. Nun tien qu’haber más llinies encarnaes pa los derechos nin llímites temporales pal procesu. Mientres nun se disuelva la Xunta Xeneral nun vamos dexar de recorda-yos que siguen teniendo la responsabilidá y la obligación d’iguar la falta de derechos na sociedá asturiana.