La XDLA avisa de la maniobra de la estrema derecha pa torgar l’usu normal del asturianu na Xunta Xeneral

Esti llunes 28 de setiembre va llevase a consideración na Xunta Xeneral una agresión nueva de la estrema derecha contra’l derechu al usu de la llingua asturiana.
Yá al principiu d’esta llexislatura fixeron un exerciciu de cinismu vergonzosu cuando, de la mano del Partíu Popular, quitaron de que la conseyera de Cultura, Berta Piñán, falara n’asturianu na esplicación del programa d’actuación de la so Conseyería. Facíen ostentación de la so inorancia al defender el derechu a nun entender l’asturianu, pero tamién interpretaben restrictivamente’l reglamentu de la Xunta Xeneral, qu’hasta agora permitía les intervenciones n’asturianu y gallegu-asturianu a los diputaos y diputaes, pero nun mentaba espresamente a los miembros del Gobiernu.
Esto llevó a que nel plenu de la Xunta Xeneral del 1 de xunetu pasáu, una amplia mayoría de 27 votos a favor, con 13 en contra y 5 abstenciones, aprobara una modificación del reglamentu de la cámara qu’incluyía espresamente esta aclaración: “tanto los Diputaos nel exercicio de les sos funciones parllamentaries como los miembros del Conseyu de Gobiernu, los cargos y empleaos públicos y cualquier persona que compareza énte la Cámara van poder usar el bable/asturianu”.
Sicasí, esta propuesta nueva de la estrema derecha intolerante quier invalidar lo llograo col respaldu de la mayoría, pa torgar l’usu normal de la llingua asturiana.
La Xunta pola Defensa de la Llingua Asturiana considera especialmente grave que quiera negase’l derechu a usar l’asturianu a les persones que tienen la representación política de los asturianos y asturianes.
L’usu de la llingua asturiana nun pue implicar la obligación de presentar tamién una traducción al castellanu de tolo que se diga. Nun ye posible facelo nos debates parllamentarios, que, como cualquier debate, nun tien un guión previu, pero amás esa imposición de la traducción búrllase del derechu a falar n’asturianu, porque niega la igualdá de condiciones amestando cargues adicionales pa quien quien quier facer usu d’ello.
El derechu a usar l’asturianu o’l gallegu-asturianu ye un derechu irrenunciable de tolos asturianos y asturianes. Les alministraciones tienen la obligación de poner los medios necesarios pa garantizar esi derechu y, polo tanto, los diputaos y diputaes de la Xunta Xeneral que tean a favor d’esi derechu tienen la obligación de parar esti ataque d’intolerancia.
Tamién han ser conscientes que mentanto l’asturianu y el gallegu-asturianu nun se reconozan como llingues oficiales, los derechos llingüísticos n’Asturies van siguir tando albentestate, sometíos a les agresiones de contino de minoríes antidemocrátiques y d’interpretaciones llegales restrictives y discriminatories.