La XDLA critica'l tratamientu informativu de TPA a los actos de defensa del idioma qu’entama la sociedá civil

Esti 8 de xunu, la Xunta pola Defensa de la Llingua Asturiana (XDLA) celebró’l Conciertu pola Oficialidá y la edición d’anguaño convirtióse en tou un éxitu al ser una de les más concurríes de los últimos tiempos del festival. Amás, la cita cumplió’l sábadu pasáu’l primer cuartu de sieglu, dalgo que convierte al Conciertu pola Oficialidá nuna de les feches más importantes del calendariu musical y una actividá señalada dientro del panorama cultural asturianu. Al festival reivindicativu y musical acudieron unes 1.500 persones, lo que fixo qu’hubiera que colgar el cartelu de nun hai entraes. Too ello a pesar del tratamientu que-yos dieron los medios de comunicación del país, que namás informaron de la cita a posteriori, a pesar de lo noticiable que yera cumplir 25 años y los intentos de boicó del Centru Internacional Niemeyer y del Conceyu d’Uviéu.

Con too, poco pue dicir la XDLA de los medios de comunicación privaos, más allá de lo criticable que ye dexar el so compromisu colos llectores o oyentes y el so códigu deontolóxicu de llau, pero otra cosa ye la TPA: un mediu públicu y que d'alcuerdu cola llexislación vixente tien qu’usar y fomentar l’usu del idioma, amás d’atender al interés xeneral de la sociedá asturiana. Naide pue negar que la llingua y la cultura propia tienen interés dientro de la nuestra sociedá —na TPA sábenlo bien al ver les audiencies de los sos programes n’asturianu— y qu’eso mesmo pue dicise del Conciertu pola Oficialidá —25 ediciones y éxitu de públicu—. Del mesmu mou, una televisión autonómica tien que valir como mediu de tresmisión d’información y conteníos, y, al empar, como instrumentu d’integración social, de refuerciu identitariu y de normalización llingüística, amás de buscar sinerxes promoviendo la integración de les fuercies sociales, dende la iniciativa popular a la de carácter más institucional. Por eso, el tratamientu informativu que-y dio la TPA al Conciertu pola Oficialidá paeznos dalgo insultante.

Y yá nun ye namás la cita d’esti sábadu. Asina, el 4 de xunu, nengún equipu de la televisión autonómica acudió a cubrir la inauguración de la esposición sobre los 25 años del Conciertu pola Oficialidá, actu col que la XDLA aprovechó pa homenaxar a los más de 70 grupos que pasaran pel conciertu. Tampoco nun acudió la televisión que dicía ser “reflexu d’Asturies” a la rueda de prensa que se fixo’l vienres 7 pa presentar la edición que fixo’l mediu sieglu. Ente tanto, la redacción del diariu electrónicu catalán Vilaweb —el más lleíu nesta llingua— púnxose en contactu cola XDLA porque queríen publicar una crónica sobre los 25 años de Conciertu pola Oficialidá. Paez que ye fuera d’Asturies onde saben reconocer el compromisu de llevantar, añu tres añu, 25 ediciones de conciertos de música n’asturianu, con tol trabayu qu’ello supón y tola actividá económica que xenera. Nun foi hasta’l domingu 9, na primer edición del TPA Noticias —evidentemente, nun se dixo un res enantes del conciertu, nun fore ser que-y diren publicidá a la cita, debieron pensar—, cuando los responsables del informativu decidieron dedicar unos segundos pa falar de la XXV edición. Amás, consideraron más destacable una “caravana del amor” en Piloña o la primer misa del Obispu Auxiliar, a la qu’acudieron 200 persones —hai que recordar qu’al Conciertu foron 1.500—.

Nun ye la primer vez que la TPA da un tratu marxinal a feches señalaes nel calendariu de la reivindicación llingüística. Asina, el 3 de mayu, Día de les Lletres Asturianes, la manifestación pola oficialidá del asturianu —a la qu’acudieron unes 3.000 persones— y la Xunta Estraordinaria de l’Academia de la Llingua namás ocuparon un minutu en total al final del informativu. Los actos qu’entamó la sociedá civil y la máxima institución llingüística del país recibíen el mesmu tratamientu qu’en TPA recibe un certame gastronómicu o un accidente de coche en Burgos, por poner unos exemplos. La situación choca cola de Galicia y la TVG, que’l 17 de mayu celebró’l Día das Letras Galegas cola retresmitisión en directo del actu de la Real Academia Galega per TVG y Radio Galega. Mentanto, nel TPA Noticias del mediudía del 3 de mayu nun hubo nenguna noticia que recordare que yera’l Día de les Lletres Asturianes.

Per otru llau, el 29 de mayu, depués de que cientos de neños de siete escueles de Mieres entonaren el cantar “Chalaneru” xunto a Chus Pedro pa celebrar el 25 aniversariu del conservatoriu municipal, l’informativu de la TPA afirmaba que los neños interpretaren “una canción más propia de la época de sus padres”. Nun nos figuramos a TVE o a la BBC presentando un cantar que forma parte de la memoria colectivu del pueblu español o inglés coles mesmes palabres… Del mesmu mou, la XDLA lleva meses denunciando la falta de visibilidá que tien la industria cultural n’asturianu —música y lliteratura fundamentalmente— nos informativos de la canal pública, mentes sí qu’hai sitiu pa falar de discos d’artistes madrilanos o d’esposiciones que se faen na capital d’España.

Otra manera, ye menester facer un repasu pela atención mediática que fixeron otres cadenes autonómiques a actos qu’entamó la sociedá civil del so territoriu. Asina, les canales de televisión catalanes dedicaron una cobertura especial a la manifestación del 11 de setiembre del 2013, con una retresmisión conxunta per TV3 y 3/24 con conexones en directo, entrevistes y hasta un helicópteru qu’ufrió imáxenes aérees. Y estes retresmisiones hai que veles más allá d’una determinada ideoloxía; tienen que ver col interés xeneral hacia la información sobre una convocatoria masiva —y que foi noticia nos medios de tol mundu—. De la mesma manera, nel 2010 TV3 utilizó los últimos avances tecnolóxicos pa retresmitir tolos actos de la visita de Benedictu XVI a Barcelona. Pol mesmu interés xeneral, el PSOE de Madrid lleva años pidiendo a l’autonómica madrilana que retresmita en directo la Marcha del Arguyu Gai, qu’axunta tamién a dos millones de persones nes cais de la capital d’España. Como curiosidá, nel 2013, los socialistes comparaben la cobertura mediática que dedicaba TeleMadrid a les visites del Papa cola promoción escasa a una de les fiestes que más beneficios xeneraba na ciudá. Nel llau contrariu, TPA nun fixo nengún debate o reportaxe sobre la oficialidá del asturianu, una reivindicación que lleva 40 años nes cais d’Asturies y que convierte al movimientu de reivindicación llingüística nel principal movimientu social del país. La situación estraña tovía más cuando esti tipu de debates y reportaxes sí se pudieron ver na televisión aragonesa —con una llingua propia que tien 10.000 falantes—.

Por exemplu, la Korrika —una carrera popular que percuerre tol País Vascu en defensa del idioma d’esta tierra— tien un siguimientu especial n’EITB, la radiotelevisión vasca, con programes especiales n’ETB-1 sobre la salida y n’ETB-3, con toles etapes. Amás, les emisores de radio tamién dedicaron tiempu a esti eventu en dellos programes. Nesi mesmu sentíu, la Feria del Llibru y el Discu Vascu de Durango tuvo un siguimientu especial nos díes que duró la cita al traviés de los informativos d’ETB, con conexones en directo, reportaxes y entrevistes a dellos protagonistes de la cultura vasca. ETB3, per otru llau, programó un resume diariu de los actos y eitb.com, que tien una páxina especial dedicada a la feria, emitió en directo la mayoría de presentaciones y conciertos. Amás, les radios Euskadi Irratia y Gaztea emitieron dellos programes dende Durango. Y esto fíxose col gobiernu del PNV, pero tamién cuando Patxi López yera’l primer lehendakari socialista. Estos exemplos choquen cola actitú que tien RTPA —tamién TVE, qu’hai que recordar que ye una televisión pública que tien programación p’Asturies— pa cola llingua y cultura asturiana, marxinando’l so usu na televisión y na radio y escondiendo les actividaes qu’entama la sociedá civil pa da-y una mayor proyección de futuru al nuestru idioma. Mentanto, Radio Sele –emisora que tan una situación bien precaria y a la que’l Gobiernu socialista robó-y la llicencia d’emisión- tuvo años emitiendo en directo’l Conciertu pola Oficialidá. Bien podría garrar’l testigu la RPA, qu’actualmente nun tien nengún programa onde se promocione la nuestra música.