La XDLA denuncia que RPA lleva ensin emitir el boletín informativu diariu n'asturianu dende'l 27 d'ochobre

La Xunta pola Defensa de la Llingua (XDLA) denuncia que la Radio Televisión del Principáu d'Asturies (RTPA) lleva ensin emitir dende'l 27 d'ochobre pasáu l'únicu espaciu informativu que producía, 'Les noticies n'asturianu'. Tratábase d'un espaciu de diez minutos n'asturianu que s'emitía de llunes a vienres na RPA a les 12.00 hores. La so desaparición vien a sumase a los pasos atrás que dio l'asturianu na RTPA nesta llexislatura, na que nun se dobló nenguna película o serie de dibuxos animaos y tampoco nun se retresmitió nengún partíu de fútbol n'asturianu, iniciatives éstes que, con too, siempre se programaron de forma simbólica y anecdótica, ensin nenguna continuidá.
Hai selmanes, el director xeneral de RTPA, Francisco Orejas, anunció que nos meses vinientes diba incorporase de forma “gradual” l'asturianu a 'TPA Noticias' cola emisión de dalguna pieza del informativu. Agora, depués de 16 años d'emisión, dicen que tán estudiando cómo introducir l'asturianu nos informativos de TPA, pero al empar desaparez el noticieru n'asturianu de RPA. La situación muestra que l'anunciu d'Orejas nun ye más qu'una cortina de fumu pa disimular una programación qu'incumple la Llei d'Usu y los principios rectores de RTPA, que señalen que l'asturianu ha tar presente nel so funcionamientu normal como reflexu de la garantía del derechu de la ciudadanía a disponer de medios de comunicación social n'asturianu.
Quiciás d'equí a un añu veamos a Orejas diciendo que 'TPA Noticias' nun pue emitir información n'asturianu porque nun tienen redactores formaos pa facelo -anque sí los hai pa dar la información metereolóxica y el fútbol n'asturianu, pero tampoco nun se fai-. Nel 2005, la XDLA yá avisó que la convocatoria pública de pruebes selectives pa trabayadores de RTPA, onde nun se valoraba como méritu puntuable'l conocimientu d'asturianu, suponía que diba conformase una plantiya ensin la garantía de que l'idioma tuviera una presencia mínima. Nesti tiempu tampoco nun miraron de planificar la formación llingüística de xente de la plantiya interesao pa llevar a la práctica eses obligaciones que tien l'ente públicu pa col idioma.
La XDLA quier recordar que RTPA cuesta cada añu millones d'euros a los asturianos y, anque ye verdá que ye una de les cadenes más barates, eso nun pue valir como sida pa incumplir la llexislación y dexar de llau la llingua y la cultura asturiana. Si la dirección de RTPA nun sabe o nun quier xestionar unos medios públicos comprometíos cola medría de les nuestres industries culturales, cola normalización llingüística y cola promoción del nuestru patrimoniu, ye'l momentu de que los sos responsables dimitan. Asturies, la so cultura, la so llingua y la so industria audiovisual nun puen esperar otros 16 años.