La Xunta pola Defensa de la Llingua Asturiana critica la falta de concreción de la Sra. Conseyera d'Educación, Cultura y Deporte

Esti martes pasáu, la conseyera Ana González, adelantó lo que van ser les sos llinies polítiques d'actuación no que queda de llexislatura. Y, no referente a la política llingüística y enseñanza, dependiente del so departamentu, nun pudieron ser más inconcretes les sos afirmaciones.

 

En cuanto a política llingüística, solo fixo referencies a una supuesta promoción del usu del asturianu per parte de l'Alministración y al posible cambiu d'estructura na celebración de la Selmana de les Lletres. Dos anuncios que consideramos de lo más secundario y con un grau d'ellaboración, ciertamente, pa llamentar. Ye d'esperar que los nuestros representantes públicos, se presenten nes instituciones representatives a contar realmente lo que van facer y non a facer un corta-apega de los sos mediocres programes políticos. Como ye d'esperar tamién, que les polítiques que se van desarrollar tengan como un mínimu imprescindible'l cumplimientu de la llexislación vixente na materia, y nun supongan, per elles mesmes, una rebaxa constante de los derechos que la ciudadanía yá tien reconocíos.

 

Pero tolo anterior nun foi lo peor y más grave; lo realmente plasmante foi la absoluta falta de referencies a la situación de la enseñanza del asturianu nel sistema educativu. Equí, la comparecencia tornóse en surrealista al nun facer neguna referencia a esti problema tan vixente anguaño. Nada se dixo de la creación de la Especialidá de Llingua Asturiana pal profesoráu y, tovía más, nada se dixo del cumplimientu de les sentencies d'abolición de la ratio que gobiernos anteriores insistieron en vulnerar; siendo agora la so obligación el recordar a tolos centros educativos d'Asturies que tienen qu'ufiertar la asignatura a toles persones que lo soliciten.

 

Por eso, dende la Xunta pola Defensa de la Llingua Asturiana (XDLA), instamos a la Conseyería y a la Dirección Xeneral de Política Llíngüistica a preparar unes actuaciones sistemátiques de normalización que nun reduzan el so llabor a simples declaraciones d'intenciones y al sordu continuismu burocráticu.