Discursu XXXI Premios Andrés Solar

solar2015
Munches gracies a toos y toes por tar equí con nós nesta XXXI edición de los Premios Andrés Solar. Un agradecimientu especial merez como siempre la familia d’Andrés, Lali y Jesús, por ayudanos a caltener vives, enceses, les idees y les lluches nes que participó Andrés y que, bien d’años depués, siguen animándonos a un llabor constante.
Esti añu que termina vieno marcáu por dellos procesos electorales, nos que tamos tovía metíos y, lo que ye más importante, polos cambeos que se puedan producir nun panorama políticu que lleva décades ensin ufiertar novedaes no referío al tratamientu de la llingua asturiana, al so estatus xurídicu, a la oficialidá...; al so futuru, en definitiva.
Pero si dalgo quedó, y ta, claro ye que nada va cambiar si nun cambia la situación de postración del asturianu, la situación de falta de derechos de les persones que queremos vivir n’asturianu. Nun va haber una política nueva si nun hai una nueva política de reconocimientu, valoración y visibilización del asturianu. Ensin el reconocimientu de la oficialidá, vamos siguir pela cuesta abaxo que nos lleva a desapaecer ensin ver los nuestros derechos respetaos.
N’Asturies, la negación de los derechos llingüísticos foi’l santu y seña de la clase dirixente que tuvimos y siguimos teniendo. Ye lo que los define. Pa les demás coses nun foron tan rigorosos: onde dicíen A, depués dixeron B; too tuvo sometío al mercadéu: los principios yeren unos y, si lo mandaben les circunstancies, camudaben por otros. Lo único inalterable ye’l despreciu y el mieu a lo propio.
El Poder almite los “trapicheos” con toles coses, pero saca’l músculu, el músculu de la intolerancia, colos derechos d’esa comunidá llingüística tan pequeña. ¡Qué raro!, ¿nun ye verdá?
¿Esto qué vien a dicir, qué nos vien a dicir? Igual ye que l’asturianu y les persones que lo falamos importen, que son, que signifiquen, que tienen capacidá de facer, d’incidir nel futuru de lo real de verdá. De superar esta Asturies hipertrofiada que namás van soltar si somos a quitá-yosla de les manes.
Esti llabor, bien lo sabéis, ye difícil. El discursu de l'asturfobia y la discriminación ta nes manes y nel calletre d’una minoría, pero d’una minoría qu’asitia’l culu en dalgunos despachos de la universidá, nes executives de dellos partíos que conocéis y nes redacciones de los periodicos que tais pensando…
Esi discursu ye'l que recibe la madreña purpurina, el madreñazu d'anguaño. Esi discursu vieyu, que fiede a rancio y que dacuando podemos pensar que yá nun ta, pero ehí aparecen los fiyísimos a demostrar lo contrario. Esti añu, esti discursu garró forma nel brotu, nun se sabe si socipáticu o de sinceridá, del “profesor” Miguel Alarcos, que fizo despreciu y escarniu públicu d'una moza pol fechu simple de lleer unos poemes n'asturianu. La cosa nun quedó ehí, porque después llegaron les ofienses y los insultos pa toles persones que falen y usen l'asturianu. Y depués llegaron más insultos y mentires de parte del equipu de columnines habituales de los panfletos marellistes que tenemos por periodicos.
Pero esta vez paez que calcularon un poco mal y españó-yos la cosa na cara. Gracies al ataque de sinceridá, tol mundu foi a ver la realidá d'unos chiringuitos y instituciones universitaries nepótiques y corruptes, creaes pa pagar favores políticos y personales a costa de les perres de toos y toes. Y nestos sitios ye onde habita esi discursu, cola complicidá de medios y del propiu gobiernín.
Afortunadamente, dende la propia agraviada hasta bona parte de la sociedá asturiana, foron quién a salir al pasu d'esi discursu y dexa-yos les vergüences al aire.
Afortunadamente, la xente comprometío cola dignidá y los derechos de les persones que falen asturianu siempre da la cara. Y d'esa xente comprometío ye siempre de lo que maś presta falar nesti actu, nestos Premios que lleven el nome d'una persona que yá ye símbolu de la llucha y el compromisu.
Compromisu que nesti actu materialízase nun Pegollu, nesi pegollu que güei recibe la xente de Sidra L'Allume por llevar alantre una idea y un proyectu que visibiliza l'asturianu nun sector básicu d'Asturies, tanto no economico como no identitario. El mundu de la sidra nun ye namás ún de los pegollos de lo agroalimentario d'Asturies sinón que tien alredor una riestra de referencies sociales y culturales que lu ficieron y faen exe de tresmisión de valores de cooperación y vertebración.
Sidra L'Allume da al asturianu'l sitiu que nunca tien que perder nel mundu de la sidra nin na sociedá asturiana en xeneral.
Desgraciadamente, nes últimes décades, la alministración vien cometiendo error tres error na promoción de la sidra, promoviendo campañes y productos qu'arrenuncien al asturianu y qu'asonsañen unes veces el palabreru castellán del vinu, otres el del xampán. Campañes que siempre tienen el mesmu resultáu, el fracasu comercial y la incomprensión cuando non la risión. ¿Qué foi d'aquello de "dir de sidras" o aquello otro de "la nueva espresión"?
Contra esto yá va años que la Xunta tuvo que sacar la campaña “La sidra, como tien que ser”, animando al caltenimientu de la llingua propia del mundu sidreru que nun ye otra que l'asturianu. Y ye que, namás con unes campañes pensaes n'asturianu vamos ser quién a diferenciar y facer valorar un productu qu'otros con gobiernos con menos autoodiu y complexos sí que saben situar.
Por eso, nesti llabor fundamental de respetu y visualización del asturianu ye importante'l puxu de los productores como los de Sidra L'Allume. Son ellos los que marquen el camín qu'hai que siguir: facer una sidra cada día más rico y normalizar l'idioma nel productu y la comercialización. Munches gracies por esti llabor, norabona pol pegollu y a siguir.
Pa dir rematando, y enantes de dar pasu a l'actuación musical, queremos como siempre facer un llamáu a la militancia y a toles persones que se sienten partícipes del movimientu de reivindicación llingüísticu a tar aliellos, a tar preparaos pal tiempu interesante que ta por venir. Mesmamente depués de mañana, la situación política y los resultaos electorales puen favorecer donámiques onde los derechos llingüísticos y la oficialidá van tener que ser defendíos con más fuercia tovía de los que lo venimos faciendo estos más de trenta años.
Como siempre, toca ponelo too, tol esfuerzu y tola intelixencia, pa que nun se vuelvan a arrequexar los nuestros derechos nin a tarazar el nuestru futuru.
Hai que siguir, asina y equí. Agora más que nunca hai que siguir.
L'asturianu, llingua oficial!