Manifestación Día de Les Lletres 2017: Discursu

Discursu Manifestación Día de les Lletres Asturianes 2017


Güei, coincidiendo col Día de les Lletres Asturianes, la Xunta pola Defensa de la Llingua Asturiana convoca, como vien faciendo bien d’años, esta manifestación pola oficialidá del asturianu.

Bien sabemos que la llucha polos derechos, la xusticia y la dignidá nun tien fin. Hai que recuperar los derechos perdíos, hai que caltener los que tenemos y hai qu’avanzar permanentemente na conquista de los derechos nuevos que son básicos pa tener una vida y un futuru.

Les décades últimes, marcaes pola reivindicación permanente y polos avances na concepción y apreciu que la sociedá tien del idioma, nunca encontraron respuesta na clase dirixente asturiana. Una clase dirixente, qu’agora vese claro, tuvo dedicada a la xestión desastrosa d’Asturies, convirtiéndola nuna comunidá fallida, onde cuasi naide ye quién a albridar un futuru factible, razonable y posible.

Por eso, na Xunta tamos trabayando pa que los derechos llingüísticos de la ciudadanía asturiana queden aseguraos definitivamente. Pa que s’abra yá d’una vez una nueva etapa de normalización y d'afitamientu de la tresmisión interxeneracional.

Llevamos meses trazando d’esplorar y andar, pela primer vez na historia contemporánea d’Asturies, caminos nuevos qu'empobinen a una reforma del Estatutu d'Autonomía, a costafecha pa incluyir la oficialidá del asturianu. Ye’l momentu y hai la oportunidá, ye la primer vez que la Xunta Xeneral tien na mano aniciar un procesu de reforma ensin nengún de los partíos hasta agora mayoritarios.

Nesti Día de les Lletres de 2017 tamos en condiciones d'anunciar yá'l "Proyectu 2018 pa la Oficialidá". Tamos falando d’echar a andar na Xunta Xeneral una reforma estatutaria al traviés del Artículu 56.1. Pa eso, contamos col compromisu d'un grupu, ampliu y plural, de más d’una cuarta parte de los diputaos y diputaes. Y dende agora mesmo vamos ponenos a trabayar pa sumar a esti procesu una mayoría suficiente que permita zarrar la reforma en positivo, aprobando la oficialidá del asturianu.

Y ye que vamos ganar tolo que nos propongamos, porque la sociedá y una parte importante de la xente que ta nes instituciones tiénenlo claro. Va un tiempín empezamos la campaña “Conceyos pola oficialidá”, que dio un resultáu perbonu y col que consiguimos que más de doscientes persones, ente alcaldes y conceyales, de 41
conceyos asturianos, ello ye, de más de la metá d'ellos, se posicionaren públicamente como partidarios de la oficialidá. Esto, de primeres, foi'l frutu del nuestru trabayu como asociación, pero tamién ye un síntoma de que toes tamos madurando como pueblu.

Ye’l momentu de demostrar que’l futuru ye nuestru, que ta y va siguir tando nes nuestres manes. El déficit democráticu que ta suponiendo la negación de los derechos llingüísticos de la ciudadanía asturiana a lo llargo de más de 30 años tien que s’acabar yá. Y va acabase, poniendo enriba la mesa la reforma del Estatutu que ye onde se tien que dexar afitao la igualdá xurídica de les persones que falen asturianu cola consecución de la oficialidá.
Pa llevar alantre esti proyectu, vamos necesitar tola vuestra fuerza y pasión na defensa del idioma, la que venís demostrando dende décades. Y amás vamos necesitar el vuestru llabor, la vuestra ilusión y compromisu.

El futuru de la oficialidá, del asturianu y del gallego-asturianu ta nes nuestres manes. El futuru mesmu, d’una Asturies habitable, vivible y xusta va depender de lo que síamos quién a lluchar.


¡L’asturianu, llingua oficial!
¡El futuru, nes nuestres manes!