Intervención de la XDLA na Comisión d'estudiu sobre'l réxime de protección y promoción del asturianu

COMPARECENCIA XUNTA XENERAL

Nel añu 1550 aconceyaben en Colexu San Gregorio de Valladolid autoridaes polítiques y relixoses pa siguir dándo-y unes vueltines a la polémica xeneral sobre la naturaleza de los indios, entiéndase indíxenes americanos, y si éstos yeren seres d’humana calidá y habitaos d’alma. Paez ser que la bula papal de 1537, a pesar de la pretendida contundencia, nun lo dexaba claro del too a los que nun queríen tenelo claro. Dalgunos años pasaron d’aquello, cerca de 500, y talmente parez que los heriedes de los que nun lo teníen claro siguen imponiendo la so opinión, les más de les veces.

Nun queremos con esto facer comparances lliniales de situaciones..., pero nestos tiempos asistimos al debate de cuálos son o han de ser los derechos de les persones que falen asturianu, que quieren falar, que quieren siguir falando asturianu. Depués de más de mil años de la forxa del idioma dende’l llatín, de 10 sieglos de documentación, de 500 de lliteratura moderna y de 40 de reivindicación social de la igualdá xurídica de la ciudadanía d’Asturies, equí nos atopamos, na Xunta Xeneral, añu 2017.

Nun hai yá debate posible sobre si l’asturianu tendría que contar col reconocimientu oficial o primero habría qu’avanzar nuna normalización que nunca llega ensin que’l derechu básicu tea reconocíu, o esperar por una demanda social que —como bon términu-trampa—, chocantemente, namás s’esixe pa la reconocencia de derechos y non pa otres cuestiones qu’acaben en tropelíes; o esperar eternamente que l’espiritu santu baxe en forma de palomba a insuflanos un consensu qu’a lo llargo d’estes décades namás valió p’apuntalar l’inmovilismu y el negacionismu de derechos... En realidá son los mesmos debates yá superaos, como los de los restos del búnker ochenteru de si l’asturianu yera una llingua o yera un dialectu.

La oficialidá, como recordaba va poco la presidenta de l’Academia de la Llingua Asturiana (ALLA), Ana Cano, efectivamente nun ye la solución pa salvar l’idioma, pero nun hai solución ensin oficialidá. Y nun ye un reconocimientu namás en papel. Va solucionar coses que siempre se tán parchiando de mala manera, como l’encaxe del asturianu nel sistema educativu (Especialidá incluida), el tratamientu nos medios públicos de comunicación, el cumplimientu de la toponimia oficial o la financiación de l’ALLA.

Y, nestes circunstancies, nesti sitiu y nesti tiempu, nun creyemos que sía’l momentu de pidir la oficialidá. Ye’l momentu de dicir, agora y equí, cómo tenemos que tener yá esa oficialidá.

Por eso, dende la Xunta pola Defensa de la Llingua Asturiana presentemos esti Día de Les Lletres Asturianes el Proyectu 2018 pola Oficialidá. Un trabayu nel que llevamos invertío bien de tiempu falando y esplorando toles opciones que nos ufierten les circunstancies actuales. Entendemos qu’esti proyectu ye importante y llega nel meyor momentu. Ye de xusticia que la oficialidá llegue al nuestru Estatutu d’una vez por toes y que lo faiga al traviés d’una vía recoyida nel mesmu testu pero nunca usada. Ye’l momentu de ponese en marcha pa empezar una reforma a partir del impulsu de más d’un cuartu de los diputaos y diputaes d’esta cámara. Ye’l momentu de ponese a trabayar pa qu’esti Proyectu sía quien a sumar toles fuerces posibles pa zarrar una reforma estatutaria en positivo y con ésitu; ésitu que namás va llegar cuando tengamos un Estatutu d’Asturies que respete y asegure los derechos fundamentales d’una parte importante de la sociedá a la qu’esta cámara representa.

Nun nos parez qu’heba qu’esplicalo con moñequinos. Pero ye evidente qu’hasta hai nada había dos partíos mayoritarios que teníen que se poner d’alcuerdu pa una reforma como la que proponemos, porque nengún diba atrevese a proponer dalgo que l’otru pudiera valtiar nuna votación con mayoría cualificada. Esi tiempu acabó, esta llexislatura cambió l’aritmética parllamentaria. Hai 17 diputaos y diputaes electos por partíos qu’apoyen la oficialidá, abondos pa entamar tou esti procesu (yá que con 12 val) y nengún de los dos partíos enantes hexemónicos pue impedir sumar la mayoría suficiente de 3/5 de la cámara, polo que nel debate va haber que defender, espresar y manifestar postures; y tamién va haber la posibilidá de modificar les que se tengan de mano. Nun va valir atechase y agachase detrás d’una falta de consensu pa nun moyase...

Parez que los y les comparecientes d’esta comisión (y dicímoslo respetuosamente a la espera de les conclusiones que se redacten) tán d’alcuerdu en qu’hai que reconocer la oficialidá. Lo que nun dicen ye cómo y cuándo, como si fuera cosa que nun hubiera que-yos esixir con naturalidá a los y les representantes de la voluntá de la ciudadanía, reuníos nesta cámara. Nós dicimoslo claro, dicimos cómo y pa qué, y dicimos que tien que ser agora. Nun ye sostenible mantener esta situación más tiempu.

Pela nuestra parte, vamos siguir trabayando, esplicando y convenciendo a los que faiga falta. Y vamos a consiguir la oficialidá. Ye’l momentu de posicionase a favor. Dilatar de manera infame la llegada de la oficialidá ye lo único que-yos va quedar a los enemigos del asturianu, d’Asturies y de la llibertá.Vamos implicar nesti tiempu históricu y definitivu a tolos actores necesarios, a toles persones que creyan y sían a imaxinar y lluchar por una Asturies más democrática y xusta.