Presentación Proyectu 2018

El respetu pola llingua asturiana ya caltrió ente los sectores más civilizaos de la sociedá, l’alfabetización de les xeneraciones más moces ye güei una realidá, agora falta esi reconocimientu oficial pa poder siguir el camín hacia la normalización de la llingua na vida de los asturianos y les asturianes. Urxe adaptar el marcu llegal del asturianu y del gallego-asturianu a la realidá del sieglu XXI: la normativa europea esíxelo, les nueves formes de comunicación fáenlo imprescindible.

Tamos nel ecuador d'una llexislatura qu'empezó cola esperanza del cambéu cola entrada na Xunta Xeneral de formaciones nueves. La reivindicación llingüística nun puede permitise repetir, a una escala más pequeña, de cuatro años, l'impás y la frustración de los más de 40 años de llucha que lleva esti movimientu. Más cuando la representación parlamentaria favorable a la oficialidá ye la más abultada de la historia del parlamentu autonómicu, significativamente mayor que la de l'anterior llexislatura. Ehí ye onde la sociedá civil tenemos la responsabilidá d'actuar, pa inclinar la balanza de les decisiones del llau de la xusticia. Ye llabor del pueblu asturianu convencer a les y los que falten pa materializar la dignificación normativa que la llingua asturiana necesita. Ye namás cosa de voluntá, nun valen sides.

La Xunta pola Defensa de la Llingua Asturiana va poner l'asuntu llingüísticu na primer páxina de l'axenda política del país, pal cursu qu'entra. Ye por eso que queremos convidar a toda persona, colectivu social o cultural comprometíu colos drechos llingüísticos de les asturianes y los asturianos. Na presentación del día 23 tamién va haber presencia de los Conceyos pola Oficialidá, plataforma que se creó hai un par d'años pa impulsar avances na normalización de usu municipal de la llingua, que tán atopando torgues pol Gobiernu central pa desenvolver ordenances d'usu del asturianu o planes de normalización nel ámbitu de les sos competencies. Tampoco van faltar representantees de les fuerces polítiques asturianes favorables a la oficialidá, asina como d'aquelles otres que aunque nun abren esi debate nel so sen, cuenten con simpatizantes o sectores favorables. Facemos extensivu por supuestu el llamamientu a toles fuerces sindicales del territoriu.

Ellí vamos alcontranos tolos sectores de la sociedá asturiana no que queremos que sía una demostración cívica a favor de la oficialidá que nun se pueda callar nin facer de menos.

Nun faltes esi día. ¡Llegó la hora!