La marquesina de Les Meanes y los indicadores de la rotonda d'entrada a la ciudá recueyen formes que nun respeten los nomes oficiales

Hai meses, la Xunta pola Defensa de la Llingua Asturiana (XDLA) esixó al Conceyu d'Avilés qu'ordenara modificar el diseñu orixinal de la marquesina de 15 metros de llargor que diba acoyer los servicios de tresporte d’autobuses del barriu de Les Meanes. El motivu yera que'l diseñu orixinal contemplaba recoyer unes lletres xigantes col nome de "Las Meanas", forma única que yá nun existe llegalmente dende'l 2010, cuando col preste de Conceyu y Gobiernu autonómicu'l barriu pasó a ser oficialmente "Les Meanes/Las Meanas". Sicasí, desque s'instaló la infraestructura, nella namás aparez (con unes lletres muncho más pequeñes que les del diseñu inicial) la forma acastellanada "Las Meanas".

Hai que recordar que’l procesu d’oficialización de la toponimia asturiana tien como fin la recuperación de los nomes tradicionales, polo que nun vemos meyor forma de visibilizar y poner en valir el nome popular del barriu que poniéndolu nuna de les zones más transitaes de la ciudá. Con too, parez que'l Gobiernu de Pilar Varela nun quier qu'esto pase y que'l nome dáu al llugar polos avilesinos dende hai sieglos ocupe'l sitiu que merez.

A too esto hai qu'añadir que nos indicadores de carretera nuevos instalaos na rotonda d'entrada a Avilés pela autopista aparecen formes que tampoco nun son oficiales, como "Gijón" o "Luanco". Por eso, la XDLA vuelve recordar al Conceyu d'Avilés y a tol equipu de Pilar Varela que tán obligaos a cumplir cola llei, tamién nesta matería. Hai que reseñar que’l procesu de recuperación de la toponimia, onde participen espertos y vecinos, surde por mor del consensu políticu y social qu'existe a favor de respetar los nomes tradicionales. Según esplica la llei, los nomes oficiales nuevos tienen qu'aparecer en tolos documentos y nos carteles indicadores. Por eso, lo contrario -lo que ta faciendo'l Gobiernu del PSOE n'Avilés- ye dir contra la llexislación vixente.

En nome de la Xunta pola Defensa de la Llingua Asturiana queremos dar les gracies a l’Academia, a los académicos y académiques, por facer esta reconocencia pública al nuestru llabor de reivindicación llingüística y de la oficialidá a lo llargo d’estos más de trenta años.

Esti vienres 8 de mayu a les 19:30 hores convocámoste a la manifestación pola oficialidá del Día de les Lletres Asturianes.
Ye una fecha a la que naide pue faltar porque ye cuando se fai visible'l compromisu ciudadanu con una reivindicación que busca un futuru dignu pal asturianu y que sigue ensin atopar respuesta nos partíos gobernantes.
Amás, como sabes, esti añu l'Academia de la Llingua Asturiana va facenos una reconocencia pública pol llabor d'estos más de 30 años de llucha pola oficialidá. Por eso, tampoco nun pues faltar nel actu del Campoamor, porque tu yes parte d'esi llabor, d'esa llucha qu'entamemos va munchos años, pero na que nun vamos aparar.

Puxa Asturies
Puxa l'asturianu
L'asturianu, llingua oficial

¡Sábadu 2 de mayu en Xixón!. Esa ye la fecha que yá podéis dir acutando nes axendes pa dir al #Conciertu pola #Oficialidá d'esti añu en Xixón.
+Sábadu 2 de mayu Xixón!!!!!
+Apertura puertes 19h
+Sala Acapulco-Casinu d'Asturies.
+Grabación en directo pa CD.
+Alienda
+K-Nalón
+Felpeyu
+Dixebra
+Adizión Etílica
+Dj Antistailo
+barra colos precios de siempre
+Anticipaes 8€
+Puerta 10€
Vémonos en Xixón el sábadu 2 de mayu, nel XXVII Conciertu pola Oficialidá. ¡Oficialidá con toles lletres!

La Xunta pola Defensa de la Llingua Asturiana (XDLA) quier mostrar la so esmolición pola situación del procesu de recuperación toponímica. Va poco, publicóse nel BOPA'l decretu que modifica la toponimia del conceyu de Bual, nome tradicional que dende febreru del añu pasáu yera la única oficial. Sicasí, según el decretu nuevu, esta villa del occidente asturianu pasa a llamase oficialmente Boal/Bual. Asina, y por mor de les presiones y la campaña de manipulación d'un mediu de comunicación, dase un pasu p'atrás na recuperación de los nomes populares depués de que se diera un pasu alantre. Nun se pue escaecer que la Xunta de Toponimia creóse pa recuperar y poner en valir la forma popular cola que los vecinos nomen a los sos llugares. Amás, ye'l Conseyu de Gobiernu'l qu'aprueba los topónimos, pero failo depués d'un trabayu de campu rigorosu y de les aportaciones de los vecinos y del mesmu Conceyu, con un periodu previu de consultes y alegaciones. Too eso inórase y despréciase namás que se crea una polémica mediática: la presión del Gobiernu llega a la Xunta de Toponimia y esta acepta cambiar lo que primero aprobara d'otra manera.
La XDLA quier criticar la dexadez de funciones de la Conseyería de Cultura y de la Dirección Xeneral de Política Llingüística, con competencies nesti terrén al traviés de la Xunta de Toponimia, pero que nesta llexislatura namás recuperó oficialmente la toponimia de tres conceyos -Bual, Valdés y Santu Adrianu-, produciéndose asina un parón nun procesu d'años que, anque hasta'l momentu diba despacio, parecía dir hacia alantre con pasu firme.
Otra manera, nesta llexislatura tamién se produció la modificación de dellos topónimos recoyíos nel decretu de Carreño, que pasaron a aprobase con denominaciones dobles. Ye de reseñar que Carreño llevaba cuasi una década cola so toponimia aprobada y que foron la desinformación y les presiones d'un mediu de comunicación les que fixeron que'l procesu fora hacia atrás.
Por too esto, y concidiendo colos diez años desque s'aprobaren los tres primeros decretos de recuperación de la toponimia tradicional -Carreño, Llanes y El Franco-, la XDLA convoca una acción nueva dientro de la campaña #Oficialidá: con toles lletres. L'actu va celebrase esti sábadu 11 d'abril a les 11 de la mañana nel muelle de Candás.

¡Sábadu 2 de mayu en Xixón!. Esa ye la fecha que yá podéis dir acutando nes axendes pa dir al Conciertu pola Oficialidá d'esti añu.
Volvemos a la época avezada del conciertu, calentando motores pal Día de les Lletres que va ser la selmana siguiente.
Sigui esti eventu, onde los próximos díes y selmanes vamos dir actualizando tola información y novedaes (entraes, cartel, grupos, materiales y munches coses más).
Vémonos en Xixón el sábadu 2 de mayu, nel XXVII Conciertu pola Oficialidá. ¡Oficialidá con toles lletres!

El miércoles 11 de marzu presentábase en Xixón un videu promocional de l’Asociación de Queseros Asturianos y la páxina web del sellu de calidá AQA (Asociación de Queseros Artesanos del Principado de Asturias), que tien como fin la promoción de los quesos artesanos d’Asturies y qu’aconceya a más de cuarenta queseríes. La Xunta pola Defensa de la Llingua Asturiana quier facer una crítica al usu nulu de la llingua asturiana nesta promoción de los productos asturianos, inda más cuando esti videu de presentación y esti sellu de calidá tienen collaboración pública de la Conseyería d’Agroganadería y Recursos Autóctonos.

La Xunta pola Defensa de la Llingua Asturiana (XDLA) entama un calendariu d'aconceyamientos coles formaciones polítiques que van presentar candidatura a la Xunta Xeneral nes próximes elecciones de mayu.

La XDLA quier con ello tresmitir les nuestres propuestes na defensa de la llingua asturiana y de los derechos llingüísticos de les persones falantes d'asturianu, cola intención de que sean asumíes y recoyíes na redacción de los  programes electorales.

La Xunta pola Defensa de la Llingua Asturiana va poner especial atención na necesidá de poner fin a la situación de discriminación llegal que carecen los/les falantes d’asturianu. Pa eso, va proponese a les organizaciones polítiques qu'incluyan de manera esplícita ente les sos propuestes pa la nueva llexislatura, la reapertura del procesu de reforma del Estatutu d'Autonomía p'Asturies onde se reconoza a la llingua asturiana como llingua oficial.

Les clases van escomenzar el martes 3 de marzu, nel local de la organización: Conceyu Abiertu, na cai La Gascona 12, baxu A, d'Uviéu, y n’horariu de 19'00 a 21'00 hores, los martes y xueves.

El preciu de la matrícula completa ye de 30 euros y pa inscribise nun ye necesaria nenguna titulación o profesión concreta. Sicasí, encamiéntase a les persones que se vayan matricular, que tengan una conocencia básica de la espresión escrita y oral del idioma.

Toles persones interesaes pueden apuntase llamando al 985 22 95 53 o al 679 65 09 98, o bien mandando un mail a la direición: info@exunta.org

Amás, la Xunta pola Defensa de la Llingua Asturiana ye entidá organizadora d’actividaes de formación permanente del profesoráu, poro, esti cursu proporciona creitos homologaos de formación al profesoráu de Primaria y Secundaria.

La Xunta pola Defensa de la Llingua Asturiana entama una acción reivindicativa esti sábadu 21 de febreru delantre de les instalaciones de la RTPA en Xixón. Coincidiendo col Día Internacional de la Llingua Materna, queremos facer visible’l papel marxinal que da la televisión pública asturiana al asturianu, funcionando como una ferramienta más de sustitución llingüística en cuenta de ser un mecanismu fundamental na tresmisión interxeneracional del idioma. La comunidá asturfalante tien derechu reconocíu na llexislación y trataos internacionales a disponer de servicios culturales y medios de comunicación qu’usen de manera vehicular la llingua asturiana.
Por eso esti sábadu 21, acompañaos de personaxes de la televisión, vamos dicir claro que queremos una televisión n’asturianu.
¡Garra la palabra, con toles lletres!: ¡Oficialidá!