Noticies

La XDLA acusa a Javier Fernández de vetar l'asturianu dientro del proyectu de llei de llingües qu'impulsa'l PSOE

Feb
16

Depués de qu'Asturies participara nun alcuentru estatal pa ellaborar una llei de llingües, agora los socialistes rexistren una propuesta de llei que veta l'usu del nuestru idioma.

El PSOE solicita que'l vascu, gallegu y catalán tean presentes nos DNI, pero n'Asturies los documentos oficiales nun cumplen nin cola llexislación toponímica vixente.

Posted By xdla read more

Taller: Introducción a la traducción pal doblaxe

Feb
16

La Xunta pola Defensa de la Llingua Asturiana convoca esti interesante cursu-taller de traducción audiovisual col oxetivu de dar a conocer a la xente en xeneral y a los interesaos nel mundu audiovisual en particular, les posibilidaes qu'estes técniques aporten a la producción audiovisual asturiana. Pa esti llabor, vamos contar con ún de los espertos más reconocíos na materia.

INFORMACIÓN Y MATRÍCULA: Toles persones interesaes puen apuntase mandando un mail a info@exunta.org o bien llamando al 649297562.

El 3 de marzu acaba’l plazu d’inscripción que va ser per orde estrictu de matriculación.

Posted By xdla read more

Caravana pola Oficialidá pel Valle del Caudal

Jan
20

Caravana pola Oficialidá pelos conceyos d'Ayer, L.lena y Mieres, esti sábadu 28 de xineru.

Salida de la Plaza'l mercáu de Cabanaquinta y finalización en Mieres a les 14:00h.

¡Axúntate a la caravana, la oficialidá va rodao!

Posted By xdla read more

Cursu d'asturianu Candás: Creación y conversación

Jan
10

La Xunta pola Defensa de la Llingua Asturiana entama un cursu de creación y conversación n'asturianu, nel que l'alumnáu va va poder perfeccionar nel bon usu del idioma tanto escritu como oral, apurriendo erbíes pa enanchar el vocabulariu conocíu; amás de nes rellaciones ente llingua y sociedá. El cursu va tener 30 hores de duración.

Posted By xdla read more

RTPA: diez años contra la llingua y la cultura asturiana

Jan
02

La XDLA fai un balance negativu del últimu añu d'emisiones de la RTPA, no que cinca a la llingua asturiana.

Posted By xdla read more

Discursu XXXII Premios Andrés Solar 2016

Dec
24
solar2016LR

Discursu XXXII A. Solar

Munches gracies a toes y toos por participar nesti actu d’entrega de los 32 premios A. Solar. Munches gracies, como siempre especiales, a la familia del compañeru Andrés, que nunca falla a la cita y nos anima y motiva pa siguir evocando’l so recuerdu y compromisu cola reivindicación d’un futuru pa la llingua asturiana.

Estos premios, que lleven el nome del nuestru militante Andrés, siguen atropando equí en Xixón a la xente que tuvo la suerte de conocelu y tratalu, pero tamién a muncha xente que nun llegó a conocelu y que sigue teniéndolu como una referencia constante de militancia política, llinguística y cultural. Y ye que, con esti númberu d’ediciones, tamos falando d’un actu y unos premios que, si miramos a los premiaos y antipremiaos, vamos poder reconstruir más de trés décades de la hestoria contemporánea d’Asturies. Vamos poder reconstruir la llucha incesante que la sociedá civil asturiana vien llevando alantre pa llograr que l’idioma viva y se llogren los derechos llingüísticos plenos de tola ciudadanía. Una llucha y un llabor que vienen topando colo que representen en lletra y espíritu los antipremiaos: l’autoodiu y la corrupción de les élites dirixentes que tenemos qu’aguantar n’Asturies.

Ye bien simbólico que, per estes feches, va agora un añu, el presidente Javier felicitara les fiestes nuna montonera de llingües de la que namás s’escluyía —cómo non: esta respuesta sabéisla— l’asturiana. Esi ye’l nivel, esa la constante. De poco va valir, colos políticos que sufrimos, qu’esi mesmu mes de xineru, el Conseyu d’Europa volviera a pidir “midíes decidíes” d’apoyu al asturianu. De poco va valir, mentes tengamos representantes como Cherines que presenten como un ésitu ser quién a prohibir l’usu del asturianu nuna comisión de la Xunta Xeneral. O como Gabino de Lorenzo, delegáu del Gobiernu, que dende’l mes de marzu anda embarcáu nuna cruzada contra cualquier midida, por curtia que sía, pa promocionar l’asturianu nos conceyos. Esta estratexa pepera non por esperable ye menos condenable; col partíu hasta’l pescuezu na corrupción, nun atopen meyor salida que la disputa del espaciu más ranciu y ultra.

Afortunadamente, a esta estratexa y a estos ataques tamos dándo-yos respuesta. Convoquemos concentraciones na Xunta Xeneral y en Delegación del Gobiernu. Tamién echemos a andar la iniciativa de “Conceyos pola Oficialidá” p’atropar a lo más activo de los cargos públicos de los conceyos na defensa del idioma y pa implicalos na reivindicación activa de los derechos llingüísticos a nivel local y, cola vista puesta na reforma estatutaria, p’algamar d’una vez l’estatus d’oficialidá.

Tampoco nun vamos quedar paraos delantre la inacción del Gobiernu asturianu actual, que nun pue enseñanos nengún resultáu. En nada s’igüó la situación llaceriosa del sistema educativu. Pasen los meses y los años, y nada se sabe de la Especialidá y nada nun se sabe d’aquelles promeses vagues como la puesta en marcha de centros piloto d’usu vehicular del idioma. Nada consiguieron pa convertir d’una vez a la RTPA nuna ferramienta de normalización social del idioma. La residualidá y la improvisación ye lo único qu’aseguren. Incluso nos obliguen a poner cara de plasmu y de contentu col anunciu esporádicu, que llega como’l turrón per navidá, de que van echar un partíu n’asturianu. Vamos ver, verémoslu… y también vamos ver en qué queden les promeses de facer regulares estes tresmisiones deportives. Pero esto nun ye más qu’un parche, y mui pequeñu. Nel llibru “La tele que queremos”, que presentemos equí en Xixón en mes de xunetu, recoyemos más de mediu centenar de documentos que demuestren los incumplimientos llegales en materia audiovisual del Ente públicu RTPA, que recueyen los incumplimientos nel usu de la toponimia oficial y qu’espeyen con claridá que, nestes condiciones, la tele pública ye más una ferramienta de sustitución llingüística y aculturación qu’una de tresmisión y afitamientu del asturianu. Nesti llibru, que vos recomendamos lleer, o polo menos mercar, tamién se dan les claves de lo que tien que ser una tele pública con una programación qu’ayude a la normalización y tresmisión interxeneracional del idioma y que tea al serviciu de la ciudadanía d’Asturies. De la mesma manera, nada fixo’l Gobiernu y la conseyería de turnu por garantizar l’usu tresversal na estructura de l’Alministración asturiana. La, per otra parte inesistente, “política llingüística” sigue arrequexada nuna Dirección Xeneral que pa poco más tien que pa entamar una selmana de xuegos florales al añu.

Pero vamos dir parando con esti repasu de más solombres que lluces, qu’hai que recordar que tamos de celebración d’unos premios que tamién tienen parte positiva y ye, ensin dulda, la parte que más esperanza da. Tolos años hai unos pegollos que tienen, sostienen y llevanten la dignidá y el futuru de la nuestra llingua.

Anguaño esi pegollu ye pa la empresa del sector de la construcción Reteyaores S.L. que, como dixo’l xuráu, usa de manera normalizada l’asturianu en tolos soportes que remana nel so llabor profesional y con eso supón un referente nun sector económicu onde la presencia de la llingua asturiana nun ye nin tolo frecuente, nin tolo visible que quixéramos. Y equí ta la importancia del so llabor y la causa d’esti premiu, porque si nos ámbitos culturales como la lliteratura y la música l’asturianu ta —gracies a la xente creador— nun nivel de cuasi normalización, n’otros ámbitos de la vida socioeconómica asturiana nun pasa lo mesmo. Ente otres coses, porque a les instituciones y al poder interésa-yos arrequexar y tematizar l’usu del idioma. Por eso consideramos tan importante l’exemplu de Reteyaores y por eso-yos damos la norabona y les gracies.

Y agora, p’acabar y dar pasu a l’actuación de L-R, préstabanos como siempre facer un llamáu a l’activación y la participación reivindicativa. La vuestra participación y el vuestru llabor ye la clave p’algamar el futuru que queremos pal asturianu. Cuando trabayáis nes concentraciones, nes manis, nos conciertos, nes caravanes… tais dando un pasu alantre que va marcar la diferencia. La vuestra llucha, la nuestra llucha, va facer que la oficialidá venga rodao, y que pase penriba de prexuicios y torgues.

Munches gracies.
L’asturianu, llingua oficial.

Posted By xdla read more

XXXII Premios Andrés Solar

Dec
16
solar2016

Los Premios Andrés Solar algamen, nesti 2016, la so XXXII edición.

El Pegollu d’esti añu 2016 quier reconocer el llabor de Reteyaores S.L. empresa del sector de la construcción que vien llevando alantre’l so llabor con especial procuru nel tratamientu y usu del asturianu en tolos soportes comerciales y sociales que manexa.

El “Madreñazu” a la Delegación del Gobiernu, na persona de Gabino de Lorenzo, poles sos acciones y midíes rancies, discriminatories y contra derechu que toma valiéndose d’instituciones, cargos y perres públiques.

La entrega de los Premios va facese’l vienres día 16 d’avientu a les 19:30 hores nel Antiguu Institutu Xovellanos de Xixón. L’actu va contar cola actuación musical de L - R (Leticia González & Rubén Bada).

Tamién, como tolos años, depués del actu va haber una espicha. Esti añu va ser nel chigre xixonés La Xuanina (Cai Caveda, 7), y la entrada val 21 euros. Pa dir, hai qu’acutar sitiu, y pa eso pue llamase al 985229553 o mandar un corréu a info@exunta.org .

Posted By xdla read more

Caravana pola Oficialidá (Gozón - Carreño)

Dec
09

Caravana pola Oficialidá per Gozón y Carreño, esti sábau 10 d'avientu.

Salida del Faru Peñes a les 11:30 y finalización en Candás a les 14:00h.

¡Axúntate a la caravana, la oficialidá va rodao!

Posted By xdla read more

XXXII Premios Andrés Solar

Dec
07

La Xunta pola Defensa la Llingua Asturiana anuncia los ganadores de los Premios Andrés Solar na so XXXII edición. Nesta ocasión el Pegollu foi pa la empresa Reteyaores S.L. y el Madreñazu foi pa la Delegación de Gobiernu na persona de Gabino de Lorenzo.

Posted By xdla read more

Cursu d'asturianu n'Uviéu (aniciu)

Nov
08

-Profesor: Héctor García Gil

-Sitiu: Conceyu Abiertu, Cai La Gascona 12, baxu.

-Duración: 40 hores.

-Entamu: martes 15 de payares 2016

-Horariu: martes y xueves de 19:00 a 21:00.

-Matrícula + material: 30 €

-P'apuntase y info: info@exunta.org // tel.679650998

La Xunta pola Defensa de la Llingua Asturiana ye una entidá acreitada pola Conseyería d'Educación pa la formación permanente del profesoráu.

Posted By xdla read more

Pages