La xornada de fuelga nos institutos dexó cuasi ensin actividá los centros d’educación secundaria y bachilleratu del país.

La convocatoria fecha pola Xunta Moza y apoyada poles organizaciones Coleutivos de Mocedaes Comunistes, conceyu Universitariu pol Asturianu, Mocedá d’Andecha Astur, Mocedá d’Izquierda Asturiana y Xuventú Asturianista; consiguió implicar a la mocedá estudiante na defensa de la llingua asturiana y de los sos derechos llingüísticos y educativos.

El grau de siguimientu de la fuelga ye mui altu en toa Asturies. Por edaes, en xeneral, el siguimientu foi mayor ente los y les estudiantes de bachilleratu y 3u y 4u de la ESO y menor nos primeros cursos de la ESO onde les edaes ronden los 12 y 13 años.

Les direcciones de dellos centros ficieron lo posible por facer fracasar la fuelga, amenazando con apercibimientos, faciendo esámenes y incluso en dellos casos unviáronse circulares a les families avisando de que nun se daríen por xustificaes les faltes d’asistencia.

Circular IES Lluanco

La Xunta Moza tien constancia d’a lo menos dos casos nos que foron les propies families les que tuvieron de dir al institutu a sacar a los rapazos pa que pudieren facer fuelga, énte la negativa de la dirección a dexalos marchar depués de pone-yos un esamen.

Los datos de siguimientu de la fuelga van actualizase nes prósimes hores. Pel momentu confírmense como definitivos:

Uviéu: participación del 85% (Los centros con mayor siguimientu foron los de la Iría y Ventanielles con un 95% y el de menor el de Pando con un 60%. L’IES de Cerdeño paró dafechu nel horariu de tarde, nun foi nengún estudiante, nel horariu de mañana’l siguimientu foi cuasi total).

Llanera: paru del 85%.

Corvera: 75% de paru.

Candás: siguimientu del 80%.

Lluanco: siguimientu del 80%.

Grau: paru del 80% nos dos centros.

Salas: paru del 85%.

Cangas del Narcea: secundaron la fuelga los dos cursos de bachilleratu.

Siero: siguimientu del 85% nel Escultor Villanueva y Ríu Nora.

Valle del Caudal: participación del 85% (El centru con más siguimientu foi l’IES de Turón con un 90%, nel de la Pola L.lena hebo un paru del 65%, nos dos de Mieres el paru foi del 60%).

Lluces (Colunga): siguimientu del 85%.

Cangues d’Onis: 95% de paru.

Ribeseya: 50% de paru.

Llanes: paru del 95%.

Xixón: paru del 60%. (El paru foi cuasi total nos IES Rosario Acuña y nel Númberu 1, menor nel IES Xovellanos y Montevil).

Llangréu: paru del 65%. (Paru cuasi total nos IES de La Felguera, baxu nel de Sama).