Ayeri xueves 6 de setiembre fíxose Asamblea del Conceyu Abiertu pola Oficialidá nun hotel d’Uviéu. El CAO nun pudo disponer de nenguna de les sales públiques que se solicitaron pa esti actu.

Sicasí, a l’asamblea asistieron más d’un centenar de representantes de les organizaciones que formen parte del CAO. Ellí, fíxose balance del trabayu fechu esti últimu añu y remarcóse la importancia del que queda per delantre, nun momentu que va ser decisivu pal futuru de la llingua asturiana yá que’l procesu de reforma del Estatutu ta entrando na so fase final. Por ello alcordáronse delles midies pa fortalecer toles estayes de trabayu de la plataforma y entamar campañes y movilizaciones más ambicioses a cada vez.

Sobre les campañes más inmediates, púnxose fecha a les prósimes movilizaciones. La Caravana pola Oficialidá dirá el 27 d’ochobre pelos conceyos de Cangas y Tinéu, y el 3 de payares per L.lena y Ayer, les actividaes qu’acompañen a les caravanes van dir zarrándose nos prósimos díes.

Asinamesmo, presentóse’l cartel de la manifestación que va facese’l sábadu 24 de payares n’Uviéu col lema "Na reforma del Estatutu, l’Asturianu Llingua Oficial". El Conceyu Abiertu pola Oficialidá quier dar un saltu cualitativu nesta movilización y multiplicar la convocatoria de les anteriores. Pa ello, ente otres iniciatives novedoses, la manifestación dirá precedida de 6 marches a pie dende Xixón, Avilés, Trubia, Mieres, La Felguera y La Pola Siero.