Esta mañana fíxose rueda de prensa nos locales de la Xunta n’Uviéu pa presentar a los medios la convocatoria de clase d’asturianu na cai del prósimu sábadu 16 de febreru.
La rueda de prensa cuntó cola participación y l’apoyu unánime de tolos sindicatos d’enseñanza d’Asturies, qu’aprovecharon la ocasión pa desixir a la Conseyería d’Educación respetu a los derechos llingüísticos de la comunidá educativa y una presencia digna de la llingua asturiana na enseñanza, en tolos niveles y graos.
Reproducimos equí’l comunicáu que s’apurrió a los medios:
COMUNICÁU
LA XUNTA POLA DEFENSA DE LA LLINGUA ASTURIANA VA DAR UNA CLAS D’ASTURIANU NA CAI
El sábadu 16 de febreru, a la una del mediudía, na plaza de La Escandalera d’Uviéu, un maestru d’asturianu va deprender delles nociones básiques del nuestru idioma. La iniciativa cuenta col apoyu de tolos sindicatos d’enseñanza d’Asturies
La Xunta pola Defensa de la Llingua Asturiana, col apoyu de los sindicatos d’enseñanza FETE-UXT, CC OO, SUATEA, USO, USIPA y ANPE llamen a la participación de la comunidá escolar y de la ciudadanía’l sábadu 16 de febreru nuna clas d’asturianu na plaza de La Escandalera d’Uviéu. L’actu va empezar a les 13:00 hores, forma parte de la campaña que ta faciendo la Xunta p’avanzar na dignificación de la llingua asturiana nel sistema educativu y que se garantice l’accesu a los derechos educativos y llingüísticos más básicos.
Entendemos que ye inadmisible que la Conseyería d’Educación se reafirme públicamente na so intención d’incumplir la llegalidá vixente y que nesti cursu escolar, otra vuelta, niegue la posibilidá de cursar l’asignatura de llingua asturiana a miles d’escolinos y alumnos de toles etapes que la pidieron voluntariamente. ¿Ye esto lo que la conseyería entiende como respetu a la voluntariedá?.
Na educación secundaria, l’asignatura d’asturianu nun s’ufierta nin en tolos centros nin en tolos cursos nin a tolos alumnos. Onde esiste la ufierta, faise competir con otres asignatures del llistáu d’optatives, lo que discrimina a los alumnos que quieren estudiar asturianu al nun tener accesu a la mesma formación que’l restu compañeros. Esto ta prohibíu esprésamente na llei d’Usu y Promoción del Asturianu.
Sicasí, la Conseyería non solo nun fai por meyorar la situación de l’asignatura na educación secundaria sinon qu’entama a xeneralizala tamién na educación primaria: Na educación primaria, anque l’asignatura tampoco s’ufierta en tolos centros, nin en tolos cursos nin a tolos alumnos, la so presencia ta muncho más xeneralizada. Hasta agora, ellí onde s’ufierta, fácíase como asignatura voluntaria, que nun competía col estudiu d’otres materies. Llamentablemente, nos últimos cursos tán detectándose iniciatives que van na dirección de convertir al asturianu n’optativa en competencia directa con otres asignatures. Lo qu’amás de dir en contra de la Llei d’Usu del Asturianu, incumple tamién lo recoyío nel Currículu de la Educación Primaria n’Asturies. Un exemplu reciente ye’l de la escuela Ríu Piles de Xixón que ta enfrentando l’estudiu de la llingua de señes al de la llingua asturiana. Amás d’esto, nos programes de centros billingües castellano-inglés nun se da opción al estudiu del asturianu.
Sobre la etapa d’Educación Infantil, la conseyería ta acabante de publicitar el nuevu currículu nel que la llingua asturiana queda relegada a una posición testimonial y ensin nenguna concrección nin planificación. La conseyería ignora qu’hai neños y neñes qu’acceden al sistema educativu col asturianu como llingua materna y que, como’l restu neños del estáu deberíen ser escolarizaos de mano na llingua propia.
Una vuelta más, esti gobiernu paez apostar pol criteriu caducu y anti-educativu de que pa deprender nueves llingües hai qu’escaecer l’asturianu.
A too esto hai qu’amestar que siguimos cola imposición de ratios mínimos pa la ufierta de l’asignatura, lo que ataca directamente al criteriu de voluntariedá, yá qu’asina nun ye una opción individual sinon que depende de lo qu’escueya’l restu compañeros y compañeres d’estudios. Como muestra de la perversión d’esti sistema: el ratiu mínimu nunca s’aplica a los que nun quieren cursar l’asignatura d’asturianu. Nesos casos, la Conseyería garantiza l’alternativa anque namás sea pa ún l’alumnu o alumna, sicasí hai bien de casos nos que son más de quince los que piden cursar asturianu y nun se-yos da la opción. La conseyería garantiza’l supuestu derechu a la ignorancia pero non el de conocer la nuesa llingua.
Na comunidá escolar asturiana ta viviéndose una conculcación de los derechos de los falantes d’asturianu. El sistema educativu d’Asturies, en cuenta de ser un garante d’estos derechos, ye anguaño ún de los pilancos principales pa que la llingua se recupere. Agora que n’otres comunidaes como Andalucía o Madrid tán abriéndose posibilidaes pal estudiu de toles llingües oficiales, equí tovía nun ta garantizáu que se pueda conocer y estudiar l’asturianu.
Por toes estes razones, la Xunta pola Defensa de la Llingua Asturiana y tolos sindicatos d’enseñanza d’Asturies llamen a participar na clas d’asturianu d’esti sábadu pa desixir una presencia digna de la llingua asturiana nel sistema educativu y que se garantice’l derechu a estudiar y conocer la llingua asturiana ensin escepciones, condicionamientos nin esclusiones.
N’Asturies, xueves 15 de febreru de 2008.
