NOTA DE PRENSA
SOBRE LES ELECCIONES AL RECTORÁU DE LA UNIVERSIDÁ D’UVIÉU
Ente les informaciones apaecíes en prensa nel día de güei sobre l’apoyu d’una organización nomada CUPA a la candidatura de Vicente Gotor al rectoráu de la Universidá d’Uviéu, y sobre la referencia nel comunicáu d’esa organización a la campaña pola defensa del asturianu na universidá llevada alantre nes elecciones anteriores; la Xunta Moza vese na obligación d’esclariar lo que vien darréu:
1. La Xunta Moza foi la organización qu’entamó la campaña pola defensa del asturianu na Universidá nes pasaes elecciones a rector del añu 2004.
N’aquella ocasión, de los dos candidatos al rectoráu sólo Vicente Gotor asumió’l decálogu de propuestes presentaes pola nuesa organización. La Xunta Moza retiró n’aquel momentu la campaña alternativa pol votu nulu y pidió formalmente que nun se diera apoyu al candidatu Juán Vázquez por escluyir a la llingua asturiana nel so programa electoral.
2. Nesta ocasión, la Xunta Moza entamó un calendariu de reuniones con tolos candidatos pa ufiertar nuevamente un decálogu de propuestes prioritaries pa la dignificación y normalización de la llingua asturiana na Universidá d’Uviéu.
La Xunta Moza quier destacar que nes presentes elecciones al rectoráu:
Los dos candidatos, Vicente Gotor y Paz d’Andrés, asumieron públicamente como propies toles nueses propuestes.
Esta ye la razón pola que la Xunta Moza nun entamó nenguna campaña alternativa: la llingua asturiana yá ganó estes elecciones.
La Xunta Moza quier traslladar les meyores felicitaciones a los dos candidatos pol so compromisu nel respetu a los derechos llingüísticos de la comunidá universitaria
El consensu llográu ye un ésitu ensin precedente y un síntoma claru d’avance social de les posiciones favorables a la llingua asturiana. La llingua asturiana ye un patrimoniu común de tolos asturianos y asturianes, per enriba d’ascripciones sectoriales, polítiques y/o ideolóxiques; por ello, la Xunta Moza quier recordar que la defensa de la llingua asturiana ha facese siempre dende’l respetu más estrictu a la pluralidá de la sociedá asturiana.
