Esti martes 3 de xunu’l Conceyu Abiertu pola Oficialidá presentó una campaña novedosa col oxetivu de llograr el reconocimientu de la oficialidá de la llingua asturiana na prósima reforma del Estatutu d’Autonomía.
La campaña Yo doi la cara pola OFICIALIDÁ consiste na recoyida masiva y esposición de semeyes individuales de persones posando con un mismu cartel que lleva’l testu que da nome a la campaña. Pa ello ta yá colgada na rede la páxina www.doilacara.net, na que pue accedese a la información sobre la campaña, a enllaces pa descargar y imprimir la fueya del cartel y a un corréu electrónicu al que mandar les semeyes: doilacara@gmail.com.
Eu dou a cara pola OFICIALIDÁ ye la versión, tamién ta disponible, de la campaña en gallego-asturianu pa la zona del Navia-Eo.
Una campaña disañada pa llevar a tola ciudadanía asturiana la iniciativa de la defensa del nuesu patrimoniu llingüísticu. Una propuesta abierta a la participación de toos y toes que permite que cualquier ciudadanu o ciudadana pueda ser protagonista activu de la reivindicación de los derechos llingüísticos n’Asturies: dando la cara pola oficialidá y espardiendo la campaña ente les persones del so entornu, familiares, vecinos, compañeros de trabayu, asociaciones de tou tipu, etc, etc.
Ente los actos que van entamase nos prósimos díes pa esparder esta iniciativa, va facese una recoyida de semeyes per tolos campus universitarios d’Asturies; contactos informativos con más de doscientes asociaciones y una fiesta de presentación en La Casa Posafuelles (La Cuesta la Vega 10, Uviéu) el prósimu vienres 6 de xunu. A partir d’ehí la campaña siguirá con un calendariu d’actos que llegarán a tolos conceyos d’Asturies.
La campaña Yo doi la cara pola OFICIALIDÁ valdrá pa evidenciar el respaldu mayoritariu de la sociedá asturiana hacia la reivindicación de la oficialidá. Valdrá p’apelar a la responsabilidá de los partíos asturianos representaos na Xunta Xeneral que tán nestos momentos debatiendo sobre los conteníos de la prósima reforma estatutaria. Ye’l momentu de que, ehí onde tovía permanezan, desapaezan d’una vez los prexuicios y les posiciones restrictives y se dea pasu a que se nos reconoza, por fin, el derechu a usar la nuesa llingua propia llibremente, ensin prohibiciones nin restricciones. Un derechu reconocíu na Constitución y que yá esfruten, dende va más de venticinco años, el restu ciudadanos del Estáu.
