Ayer, en rueda de prensa, el Conceyu Abiertu pola Oficialidá (CAO) convocó a la ciudadanía asturiana pa qu’acuda a la manifestación que col lema "Ensin Oficialiá nun hai estatutu que valga" va recorrer les cais d’Uviéu’l prósimu sábadu día 4 d’ochobre.

La manifestación va salir de la estación del norte a les 18.00 hores. Tará encabezada por una pancarta formada por persones independientes, del mundu de la cultura les artes y el deporte, como Luis Arias Argüelles Meres, Cármen Gómez Ojea, Xosé "Ambás", Marta Elola, Ástur Paredes, Beatriz Rodríguez Viado, Luis Pascual, Miguel Ramos Corrada y Anabel Santiago, ente otros.

El recorríu va acabar na Plaza de la Catedral y ellí tres la llectura d’un comunicáu, la cantante Anabel Santiago interpretará unes pieces de tonada asturiana. Con esti actu de protesta la platafroma cívica formada por más de 300 organizaciones representantes de la sociedá civil asturiana quier demostrar, una vuelta más, l’apoyu multitudinariu esistente n’Asturies a la reivindicación llingúística y el sentir unánime a favor de la so reconocencia como instrumentu de comunicación cotidianu y como elementu vital de la cultura. Un valor qu’hai que protexer na mesma midía que se fai n’otres comunidaes del estáu que tienen llingues propies.