Al empezar el cursu académicu, tres de delles denuncies sobre casos d’ataques a la matriculación na asignatura de Llingua Asturiana n’escueles y institutos, y l’acción de La Pita nel actu anual d’inauguración del cursu universitariu, la Xunta Moza entama esta aición, que ye la primera d’una riestra d’elles pola inclusión d’un títulu de grau pa la llingua asturiana na Facultá de Filoloxía y pola normalización de la presencia del idioma na universidá asturiana.
Amás d’esto la Xunta yá aconceyó nesta última selmana col Decanu de la Facultá de Filoloxía José Antonio Martínez y col Rector Vicente Gotor pa intercambiar información y tresmiti-yos que la reivindicación d’un marcu xustu y igualitariu pa la llingua asturiana na universidá nun va facer rebaxes, dende la Xunta siguiremos trabayando por ello hasta llogralo.
A estes altures, depués de pidir la propia Facultá de Filoloxía en 1996 la creación d’una llicenciatura de Filoloxía asturiana, qu’igualara l’idioma d’Asturies no académico a les demás llingües peninsulares, nun se pue contemplar otra cosa que nun sía equivalente a esta petición. El marcu académicu européu nuevu nun pue valir como sida p’arrequexar l’asturianu nuna categoría menor.
Hai que sorrayar que, siendo la Universidá la institución cultural más importante de la sociedá, nun pue ser cómpliz de la marxición y l’amenorgamientu que carez l’asturianu. El fechu de perdese a lo último del cursu pasáu una votación de calter políticu contra una propuesta que técnicamente asitiaba’l asturianu nun sitiu dignu pa cualquier llingua, nun val d’escusa pa renunciar a ello. Pidimos la inclusión del asturianu como un títulu de grau a sabiendes de que p’algamalo nun hai más que materializar les bones palabres y los xestos convirtiéndolos nuna realidá tanxible na que la llingua propia d’Asturies tenga el sitiu que merez.
