Nel discursu añal, lleíu pol compañeru Carlos Pulgar, fíxose un recorríu peles dificultaes y les torgues puestes nel camín de la revitalización del idioma, amás de les oportunidaes abiertes y los avances fechos pola organización nel añu qu’acaba. Na llectura, Carlos Pulgar faló tamién de la dirección na que se va trabayar nel añu entrante.
El presentador del actu, Naciu Varillas, dio pasu a Yolanda Huergo, que fizo de vocera del xuráu de los premios y que dio llectura a les actes onde se valoraron los merecimientos de los premiaos. Éstos básense nos criterios que pa la Xunta tienen que concurrir tanto nel casu del Pegollu, el premiu positivu, y el Madreñazu, el premiu negativu. Reseñóse la postura que l’antipremiáu, Fernando Lastra, portavoz de la FSA, mantién nes sos declaraciones públiques y privaes: el proyectu d’esti partíu pal asturianu ye da-y una solución final, negándo-y que seya fonte de derechos y polo tanto llingua oficial, y torgando con eso tolos calces serios que necesita pa sobrevivir. Nos planes del Partíu Socialista namás se conciben midíes de pega que nun valen p’aparar el desaniciu lentu y inexorable nel que vive la llingua asturiana. Como bien diz el recién espublizáu Informe del Conseyu d’Europa, namás valen les midíes firmes y urxentes, comprometíes dafechu cola revitalización del idioma propiu d’Asturies.
El discursu lleíu pol decanu del Colexu d’Informáticos, David Melendi Palacio, esclarió’l momentu especial pal asturianu en rellación coles tecnoloxíes nueves y faló de la necesidá, cumplida en dalgunos casos con proyectos que funciones a diario, de contar con ferramientes afechises na dómina actual. Arriendes d’eso fizo una valoración específica de la importancia de llabores como’l que fai Softastur per esti camín. El Decanu felicitóse polos preseos qu’hai agora y los qu’hai en desenvolvimientu pero quixo tamién poner el güeyu nes dificultaes y nes carencies, mirando porque se sigan sumando más iniciatives qu’asitien l’asturianu nel presente tecnolóxicu y reclamando que se faga con bases curioses que-y permitan adaptase harmónicamente con toles novedaes que vengan per delantre.
Mikel, el perconocíu miembru de Softastur, fizo una descripción de los trabayos nos que se ta centrando la plataforma y presentó un videu onde se fala específicamente del so llabor na traducción al asturianu de la interface d’usuariu Ubuntu del sistema operativu GNU-Linux.
L’actuación del grupu DRD zarró l’actu d’entrega con un repasu a dellos cantares que s’integren na so última colección de temes.
Como tolos años, depués de los actos celebróse una espicha nuna conocida sidrería de Xixón onde participaron premiaos, familiares d’Andrés Solar, miembros de la Xunta, músicos y muncha más xente comprometío col futuru del idioma.
Descarga equí el discursu añal de la Xunta
Calca nes semeyes si les quies ver ampliaes
