Nun día que la lluvia nun dio tregua riaes de xente enllenaron la carpa de la Xunta p’asistir al XXI Conciertu pola Oficialidá.

La última edición volvió ser un éxitu de convocatoria y una amuesa mui bona de la calidá y vitalidá de la música n’asturianu, nuna xornada qu’axunta reivindicación y folixa.

El conciertu foi otru añu más un bon escaparate pa les campañes y materiales de la Xunta, y fundamentalmente pa la convocatoria de la manifestación pola oficialidá del Día de les Lletres Asturianes.

Les más de dos mil persones qu’asistieron al conciertu pudieron esfrutar de los sones tradiconales de los veteranos del tríu Tuenda y de los Gatos del Fornu. EL folck asturianu pero con raigaños musicales del centru d’Europa tuvo a cargu de La Bandina, mentantu que Felpeyu dieron cuenta de la so propuesta orixinal. El rock fechu n’asturianu tuvo representáu poles canciones enerxétiques de Skama la Rede, poles versiones y el tonu reicvindicativu de Skontra y por una memorable actuación de Dixebra que lliteralmente fundio los plomos del XXI Conciertu pola Oficialidá.

La Xunta pola Defensa de la Llingua Asturiana quier agradecer el compromisu y la solidaridá demostraos por tolos grupos y artistes. El so apoyu ha valir pa poder siguir lluchando por algamar l’oxetivu de la oficialidá.