ACABÓ’L CURSU D’ASTURIANU DE LA XUNTA

Un añu más, y ante la falta de cursos de formación en llingua asturiana p’adultos per parte de les alministraciones, dende la Xunta pola Defensa de la Llingua Asturiana vímonos na obligación de llenar esi vaciu educativu con una edición más del cursu d’alfabetización p’adultos en llingua asturiana.

Esti añu cuntó con una participación mui alta d’un alumnáu qu’a lo llargo d’estes sesenta hores llectives asistió de forma continuada a les sesiones nel nuestru local del Conceyu Abiertu.

Asinamesmo, el cursu d’esti añu cuntó con dalguna novedá, ente otres, l’asistencia al cursu de delles persones vinculaes a estremaos ámbitos de la vida cultural asturiana: Xulio Casado de la Xunta pola Defensa de la Llingua Asturiana, Nacho Gonzali, maestru de llingua asturiana, Penélope Miranda; presidenta de l’Asociación de Trabayadores en Normalización Llingüística y responsable de la Oficina de Política Llingüística de L.l.ena; Xulio Vixil de Radio Sele; Beatriz Redondo, directora del selmanariu Les Noticies; Xosé Ambás espertu en tradición oral; Marcos Álvarez y Íñigo Varela de Softastur, etc. A toos ellos y a toes elles queremos da-yos les gracies pol so compromisu pa col idioma y pola so participación desinteresada nesti cursu.

Zarramos el cursu con una excursión a la Ruta del Quesu y la Sidra d’Asiegu, ruta bien guapa pa conocer meyor non sólo’l procesu d’ellaboración del quesu y la sidra, sinón tamién la ordenación del territoriu o los derechos consuetudinarios vixentes, y como non, la llingua na so espresión más oriental.

Esperamos la vuestra participación en futures ediciones.