Nos llugares d’Asturies suel haber una casa onde la xente apara de tarde al volver de trabayar, o a cualquier hora si-yos queda de pasu. Una casa d’un vecín cualquiera onde siempre hai xente na cocina y onde cualquiera puede entrar a dar parola. Una casa alcontradiza onde siempre te ponen un cafetín o un vasu, onde se cunten histories y onde -si cuadra- s’echa una cantarada y lo que siga. Por eso, presta posar el fuelle, la ferramienta o les madreñes n’estragal, pegar una voz na puerta y entrar a pasar un ratadín, cola seguranza de que nesa casa vas ser bien recibíu y que siempre vas tener daqué d’arruelu.

Esa casa -que ye un elementu mui propiu de la nuestra vida tradicional- ye lo que se llamó siempre «la casa posafuelles». Y agora la Xunta pola Defensa de la Llingua Asturiana abre un chigre con esti nome, col que quier caltener na vida uviedina esi espíritu tradicional, xuncíu agora a la reivindicación de la normalización social de la llingua asturiana. Una casa onde les actividaes culturales asturianes van tener un espaciu atrocáu. Una casa onde la llingua asturiana ye oficial y que tien na defensa del idioma la so principal razón de ser.