Discursu Llingua materna

La llingua materna ye la primer llingua qu’ún depriende cuando ye un rapacín; ye la llingua adquirida de xeitu natural, quier dicise, ensin intervención pedagóxica y con una actividá mínima, o ensin ella, de reflexón llingüística consciente; esto ye: la llingua materna ye aquélla que vamos interiorizando dende neños, la que mazcamos nel nuestro entornu, aquélla cola que más nos identificamos.

Güei tamos equí pa mostra-y a la nuestra, a la llingua asturiana, tol ciñu que-y tenemos por ser el nuestro vehículu d’espresión; por ser tán válida como’l restu d’elles pa dicir «Quiérote», pa dicir «Fáesme falta», pa dicir «Namás tu gobiernes el mio corazón»; por ser la única capaz a valinos, anque namás seya, pa nun quedar ensin palabres cuando tas delantre la moza o del mozu que te presta.

Lo que queremos facevos ver a toos y a toes vosotros dende Xunta Moza ye qu’esti día que güei celebramos (anque en realidá el Día Internacional de la Llingua Materna ye’l domingu) tien que ser vistu como una fiesta, como si se tratare d’un cumpleaños onde lo único que tenemos que facer ye festexar la llegada d’otru añu, otru añu más que-y ganamos al quedar mudos y al quedar colos pantalones baxaos delantre la xente que nun-y tien apreciu a la nuestra llingua y, pa enriba, tira piedres contra’l so teyáu al nun aceptar la so oficialidá, una de les poques ferramientes que nos pue asegurar la vida d’esti idioma. Agora, ensin más, vamos dir lleéndovos los testos que foron seleccionaos pa llegar a esta última fase del concursu lliterariu “Declara’l to amor pola llingua” pa que los escuchéis y, depués, vamos dicivos quién foron los escritores que, según vosotros, que fuistis los qu’escoyistis a los ganadores, merecen entrar nel Hall of Fame del Posafuelles como bonos amantes de la so llingua que son.

Más nada. Dende Xunta Moza queremos agradecer a tolos que se presentaron al concursu, que, la verdá, tuvimos mui difícil facer la escoyeta d’eses diez composiciones que tuvieron tola semana ehí espuestes, y, tamién, agradecevos a toos que teais esta nueche equí.

El ganador, Javier Cayado Valdés:

AMOR POLA LLINGUA

Crecisti camudando de viaxeros

respirada nos picos y na mina.

Vivisti pelos mares y pel aire,

gayaspera, a vegaes casi guardada.

Morristi cuando nun te fale naide

antós nun te veremos enterrada.

Sogallardi

Los nueve finalistes puedes velos nel documentu que vien darréu: