Durante tola mañana del sábadu 27 de mayu la Caravana pola Oficialidá percorrió los llugares del Conceyu Mieres: Mieres, Santuyano, Figareo, Turón, Urbiés, Ablaña, Muries, Ruturbio y Cenera. La megafonía, la treintena de coches que participaron na caravana y los más de 5.000 panfletos informativos que se repartieron ficieron bien visible la reivindicación de la Oficialidá en tol conceyu.
De tarde’l CAO entamó delles actividaes nel Parque Xovellanos de Mieres. A partir de les 18:00 bien de rapacinos fueron xugar colos xuegos tradicionales pa neños que llevó la Tertulia Cultural El Garrapiellu.
A partir de les 19:00, los y les cantantes de tonada Xicu Queipo, Begoña Rodríguez y Noemí Torrado, el gaiteru Llorián García y los grupos folklóricos Ruxidera y L’Artuxu, dexaron bien claro l’apoyu de la música asturiana a la reivindiación de la oficialidá.
Yá de nueche siguió la folixa na plaza Requexo. Ellí los vecinos participaron nuna puya de tres cestaos de productos asturianos cedíos solidariamente polos comercios y empreses de Mieres: llibros, discos, bébora y, ente los regalos más curiosos, una cena pa dos persones y un tratamientu capilar donáu por una peluquería de Mieres.
Crónica d’esta actividá en LVA y Asturies.com
