Los representantes d’Asturies ente’l Comité Européu de les Rexones apoyen una propuesta a favor del usu del catalán, gallegu y euskera nel parllamentu européu.

La Xunta pola Defensa de la Llingua Asturiana denuncia, nun comunicáu unviáu a los medios, el cinismu del Gobiernu asturianu que defende’l derechu al usu del gallegu, catalán y euskera nel Parllamentu Européu mientres sigue oponiéndose a la oficialidá del asturianu n’Asturies.

Nun exerciciu d’hipocresía vergonzosu, los representantes institucionales d’Asturies pretenden dar lleciones sobre defensa de la diversidá llingüística nel Comité Européu de les Rexones al tiempu que n’Asturies mantienen una política activa de substitución llingüística y marxinación de la llingua asturiana.

La Xunta pola Defensa de la Llingua Asturiana quier pidir al Gobiernu asturianu que desplique porqué n’Europa defende’l derechu al usu del gallegu, catalán y euskera, mientres que n’Asturies defende, consiente, avala y apoya qu’a los asturianos y asturianes se nos niegue de contino’l derechu a usar l’asturianu.

Cómo ye posible que se posicionen nes instituciones europees a favor del multillingüísmu, a poques selmanes de que la Conseyera Ana Rosa Migoya, avalara cola so presencia, la prohibición de la llectura d’una ponencia nel congresu del RIDEA por tar redactada n’asturianu.