NA REFORMA DEL ESTATUTU, L’ASTURIANU LLINGUA OFICIAL.

La convocatoria de manifestación del Conceyu Abiertu pola Oficialidá del pasáu 18 de payares volvió sacar a la cai a miles de persones.

L’éxitu de la movilización vuelve amosar la voluntá mayoritaria de la sociedá asturiana de poner fin a la situación de marxinación llegal que carez el nuesu idioma.

La manifestación salió poco depués de les seis de la tarde de la plaza de la Estación del Norte d’Uviéu. Abrió la marcha una pancarta col lema ASTURIES POLA OFICIALIDÁ llevada por un grupu de persones conocíes pola so actividá nos ámbitos de la cultura y el deporte. Ente elles la presidenta de l’Academia de la Llingua Ana Cano, el ciclista Chechu Rubiera, l’entrenador del R. Uviéu Toño Velázquez, l’escritor Xuan Bello, l’etnógrafu Xosé Nel Riesgo, el gaiteru Santi Caleya, la escultora María Jesús Rodríguez o el portavoz del CAO Fernando Ornosa.

Inmediatamente depués una espectacular banda de gaites, compuesta por más d’un centenar de gaiteros, animó’l cortexu, que siguió con una segunda pancarta del CAO llevada por representantes de les organizaciones polítiques y sindicales que formen parte de la plataforma.

El cortexu de la Xunta pola Defensa de la Llingua Asturiana y una segunda bandona de gaites abrieron la marcha al restu les organizaciones y a les miles de persones que participaron na movilización.

Depués de recorrer la cai Uría, la marcha dirixóse a la plaza Porlier onde la escritora Ana Vanessa Gutierrez lleó un manifiestu en nome del CAO.

L’actividá acabó coles actuaciones musicales del gaiteru Santi Caleya, el cantautor Carlos Rubiera y el grupu folk Los Gatos del Fornu.

Repercusión nos medios: Asturies.com, La Voz de Asturias, El Comercio.

Baxo la semeya postrera ta’l manifiestu que se lleó n’acabando la manifestación.