Noticies

RTPA, instrumentu d'una FSA vieya pa incumplir una llei d'usu que yá nun val

May
23
rtpa

RTPA sigue dando'l llombu a la sociedá asturiana con una programación marcada polos prexuicios ideolóxicos de la so dirección y del conseyeru de Presidencia del Gobiernu d'Asturies, Guillermo Martínez, del que depende RTPA. La televisión pública sigue marxinando los conteníos nel nuestru idioma, l'usu de la toponimia oficial y tratando al nuestru patrimoniu llingüísticu -nos más de los programes-, como una caxigalina que namás val pa facer chancia y pa los conteníos más d'andar per casa. Ye una situación qu'incumple sistemáticamente la Llei d'Usu, a la qu'agora dalgunos tanto s'agarren.

Los programes n'asturianu -y nun val como programa n'asturianu dicir un 'ye' y un 'prestoso' nun discursu en castellanu- tán baxo mínimos, nes cifres más baxes de magar empezó a emitir. Namás val con mirar la parrilla de programación pa comprobalo y ver que TPA nun ta cumpliendo col so mandáu llexislativu -Estatutu, Llei d'Usu y Llei de RTPA-, que diz que l'asturianu na radiotelevisión pública tien que tener una presencia amañosa.

Y ye que la televisión asturiana, al contrario de lo que manda la llexislación, exerce una discriminación hacia la llingua asturiana. Por poner namás un exemplu ente los munchos qu'hai tolos díes, nuna fecha tan simbólica como'l Día de les Lletres Asturianes, na primer canal de TPA programaron una película doblada al castellanu. Mentanto, una hora más tarde, la segunda canal programa la mesma película doblada al asturianu. Esto, amás de suponer que na cadena tienen programadores poco espiertos que nun entienden que l'audiencia va buscar lo que nun ve n'otros canales -nesti casu una película n'asturianu-, ye un exemplu claru de marxinación y de la idea que tienen los responsables de los medios públicos de priorizar la versión castellana sobre l'asturiana (que se fixera a costafecha pa emitila en TPA).

Per otru llau, l'usu de la toponimia oficial sigue incumpliéndose día a día y la RPA sigue asemeyándose a una radio local de Madrid, ensin presencia nenguna -quitando 10 minutos de llunes a vienres- del nuestru idioma. Mesmamente, la emisora pública nin emite música nel nuestru idioma fuera de la Selmana de les Lletres. Esta desconexón cola realidá cultural asturiana fai que güei RPA sía la radio xeneralista con menos oyentes n'Asturies.

La TPA, quitando poques escepciones que son gotines nuna programación mayoritaria en castellanu -o nun castellanu con interferencies n'asturianu-, sigue marcada pola diglosía y por programes de baxa calidá qu'imiten los programes de les televisiones estatales. Una situación que fai que la sociedá asturiana dea cada día'l llombu a la que tendría que ser la so televisión, que tamién ye la televisión xeneralista con menos espectadores n'Asturies.

Los asturianos nun conecten con RTPA, que, al revés que les demás emisores autonómiques, nun ye referente informativu pa la ciudadanía, nin ferramienta pal sector audiovisual, nin muncho menos un preséu pa la promoción del asturianu. Asina, la radio y la televisión pública incumplen cada día una Llei d'Usu que ta demostrando que nun val.

Y ye que la FSA vieya, la de Javier Fernández y Guillermo Martínez, y el director de RTPA, Antonio Virgili, mantienen la cadena secuestrada. Ye'l so güertu particular, non la radiotelevisión de tolos asturianos.

Esperamos un cambiu na política de programación pa que la desconexón qu'existe ente la RTPA y la sociedá asturiana nun faiga que los medios públicos tengan, igual que l'Executivu de Javier Fernández, los díes cuntaos.

Posted By xdla read more

AGORA YE'L MOMENTU

Apr
19

MANIFESTACIÓN POLA OFICIALIDÁ: SÁBADU 21 D'ABRIL A LES 12.00 HORES NA ESTACIÓN DEL NORTE (UVIÉU)

Entama: Xunta pola Defensa de la Llingua Asturiana

Posted By xdla read more

'Agora' y 'Cantar pola oficialidá' son los temes que van llamar a la participación na manifestación pola oficialidá.

Apr
14

La marcha del 21 d'abril va tar amenizada por dos bandones de gaites, un grupu de pandereteres, una batucada y un soundsysten.

Posted By xdla read more

Los conceyos asturianos tán aprobando mociones a favor de la manifestación pola oficialidá

Apr
06

Los Plenos de L.lena, Noreña y Carreño yá mostraron l'apoyu a la convocatoria del 21 d'abril de la Xunta pola Defensa de la Llingua Asturiana.

El sindicatu CC. OO., col so secretariu xeneral a la cabeza, apoyó publicamente la marcha.

Posted By xdla read more

Llei d'Usu: 20 años d'una llei incumplida y escosada

Mar
19
short

El 23 de marzu van cumplise 20 años de l'aprobación pola Xunta Xeneral de la Llei d'Usu y Promoción del Asturianu. Sicasí, dende la Xunta pola Defensa de la Llingua (XDLA) pensamos que nun ye tiempu de celebrar y falar de les bondaes d'esta norma de tenese desarrolláu, cosa que los socesivos gobiernos socialistes nun quixeron facer. Pensamos que ye tiempu de falar a les clares y dicir qu'esta norma ta escosada; qu'en dos décades demostróse a les clares qu'ensin oficialidá nun hai llei que-y valga al asturianu.

Posted By xdla read more

Cursu d'asturianu n'Uviéu (Básicu)

Mar
15

-Profesor: Héctor García Gil

-Sitiu: Cai Cimavilla 15, escalera A, 1.u C.

-Duración: 20 hores.

-Entamu: martes 3 d'abril de 2018

-Horariu: martes y xueves de 19:30 a 21:30.

-Matrícula + material: 30 €

-P'apuntase y info: info@exunta.org // tel.679650998

La Xunta pola Defensa de la Llingua Asturiana ye una entidá acreitada pola Conseyería d'Educación pa la formación permanente del profesoráu.

Posted By xdla read more

MANIFESTACIÓN: L'ASTURIANU LLINGUA OFICIAL ¡AGORA!

Mar
15

¡Llegó'l momentu de la movilización!

El sábadu 21 d'abril a les 12:00, dende la Estación del Norte d'Uviéu.

MANIFESTACIÓN: L'ASTURIANU LLINGUA OFICIAL ¡AGORA!

Posted By xdla read more

La TPA sigue dando pasos na so discriminación hacia l'asturianu

Mar
12
xuegu

Esti pasáu 11 de marzu, TPA programó la película 'Sherlock Holmes; juego de sombras' nuna versión doblada al castellanu. Hasta ehí too pue parecer normal nuna cadena como TPA, que polos prexuicios ideolóxicos de la so dirección nun fai apueste pola emisión de conteníos doblaos al asturianu. Sicasí, la denuncia de la Xunta pola Defensa de la Llingua vien porque TPA dobló y emitió hai seis meses 'Sherlock Holmes: xuegu de solombres', la versión n'asturianu d'esti llargumetraxe británicu.

Posted By xdla read more

La XDLA acusa a la dirección de RTPA de poner los medios públicos al serviciu de los sectores contrarios a la normalización del asturianu

Jan
29
rtpa

A pesar de que dende'l nacimientu de la canal pública la Xunta pola Defensa de la Llingua Asturiana (XDLA) vien criticando la presencia curtia de la llingua y la cultura asturiana, qu'incumple a les clares l'Estatutu d'Autonomía, la Llei d'Usu y la mesma Llei de Creación de RTPA, nesti momentu queremos mostrar la nuestra esmolición por delles escenes que se vienen viendo nes últimes selmanes na radio y na televisión públiques. La primera, que RTPA nun informara sobre la rueda de prensa que dio l'Academia de la Llingua Asturiana (ALLA) pa denunciar los ataques hacia'l procesu de normalización del asturianu.

Posted By xdla read more

La XDLA acusa a Javier Fernández d'usar l'argumentariu de los sectores ultraconservadores contra l'asturianu

Jan
24
javifer

La Xunta pola Defensa de la Llingua Asturiana (XDLA) quier refugar les palabres del presidente del Gobiernu asturianu, Javier Fernández, qu'esti martes volvió rellacionar la oficialidá del asturianu con "obligaciones" y faló de grupos que quieren usar l'idioma como “factor d'identidá”.. La organización nun ye a entender cómo una persona que se diz progresista ve los derechos cuidadanos como una amenaza, como fixeron y siguen faciendo los sectores ultraconservadores contra derechos como'l divorciu, l'albuertu o la igualdá del colectivu LGTB.

Posted By xdla read more

Pages